રોમાન્સ છોડી હવે હોરરની રેસમાં ઝંપલાવશે YRF; આવતા વર્ષ સુધીમાં ફિલ્મ રિલીઝ કરવાનો મેગા પ્લાન

 સ્ટોરી ફાઈનલ, આગામી મહિનાઓમાં શૂટિંગના શ્રીગણેશ; શું યશરાજ હોરર યુનિવર્સ બનાવવાની તૈયારીમાં છે?

 બોક્સ ઓફિસ પર હોરર ફિલ્મોની સફળતા જોઈ રોમેન્ટિક બેનરે બદલ્યો ટ્રેન્ડ; ફિલ્મ જગતમાં ભારે ઉત્તેજના

મુંબઈ/રાજકોટ: બોલિવુડમાં વર્ષોથી રોમાન્ટિક ફિલ્મો અને ભવ્ય સેટ્સ માટે જાણીતું યશરાજ ફિલ્મ્સ (YRF) હવે બદલાતા ટ્રેન્ડ સાથે કદમ મિલાવવા તૈયાર છે. આદિત્ય ચોપરાએ સૌને ચોંકાવતા હોરર ફિલ્મોની રેસમાં ઝંપલાવવાની જાહેરાત કરી છે. આ મેગા પ્રોજેક્ટ માટે તેમણે 'રોકેટ બોયઝ' જેવી શાનદાર વેબ સીરિઝથી પ્રશંસા મેળવનારા યુવા અને પ્રતિભાશાળી ડાયરેક્ટર અભય પન્નુની પસંદગી કરી છે.

બદલાતો ટ્રેન્ડ અને આદિત્ય ચોપરાનું વિઝન તાજેતરમાં બોલિવુડમાં હોરર-કોમેડી અને પ્યોર હોરર ફિલ્મોએ બોક્સ ઓફિસ પર કરોડોની કમાણી કરી છે. 'સ્ત્રી' ફ્રેન્ચાઈઝીની સફળતા બાદ અનેક મોટા નિર્માતાઓ આ જોનર તરફ વળ્યા છે. અત્યાર સુધી માત્ર લવ સ્ટોરીઝ અને સ્પાય યુનિવર્સ પર ધ્યાન આપતા આદિત્ય ચોપરાએ પણ હવે હોરર જોનરમાં પોતાની પકડ મજબૂત કરવાનું નક્કી કર્યું છે. અભય પન્નુએ ફિલ્મની સ્ટોરી ફાઈનલ કરી દીધી છે અને આદિત્ય ચોપરાએ તેને લીલી ઝંડી આપી દીધી હોવાનું જાણવા મળે છે.

આવતા વર્ષ સુધીમાં રિલીઝનો પ્લાન સૂત્રોના જણાવ્યા અનુસાર, ફિલ્મનું શૂટિંગ આગામી થોડા મહિનાઓમાં જ શરૂ કરી દેવામાં આવશે. અભય પન્નુ આ ફિલ્મ માટે કોઈ જાણીતા ચહેરાઓ કે નવા પ્રતિભાશાળી કલાકારોને લેશે તે અંગે હજુ સસ્પેન્સ જળવાયેલું છે. યશરાજ બેનરનો પ્રયાસ છે કે આ ફિલ્મ આવતા વર્ષના અંત સુધીમાં સિનેમાઘરોમાં પહોંચી જાય. 'રોકેટ બોયઝ' માં અભય પન્નુની ડિટેલિંગ અને સ્ટોરી ટેલિંગની ક્ષમતા જોઈને ફેન્સમાં આ હોરર પ્રોજેક્ટને લઈને ભારે ઉત્સુકતા જોવા મળી રહી છે.

શું નવું યુનિવર્સ બનશે? બોલિવુડમાં અત્યારે ‘યુનિવર્સ’ (સીરિઝ) બનાવવાનો ક્રેઝ છે. યશરાજ પાસે ઓલરેડી ‘સ્પાય યુનિવર્સ’ છે, ત્યારે જો આ હોરર ફિલ્મ સફળ રહેશે તો આદિત્ય ચોપરા હોરર ફિલ્મોની પણ એક નવી સીરિઝ શરૂ કરી શકે છે. હાલમાં તો અભય પન્નુ પોતાની આ નવી સફર માટે તડામાર તૈયારીઓ કરી રહ્યા છે.