• ઉત્તર પ્રદેશમાં વીજળી પડવાથી ત્રણ લોકોનાં મોત.

• કેદારનાથ અને બદરીનાથમાં તાપમાન માઈનસમાં પહોંચ્યું.

• હવામાન વિભાગ દ્વારા અનેક જગ્યાએ એલર્ટ જાહેર.

 સિટી ન્યુઝ @ નવી દિલ્હી

દેશના અનેક રાજ્યોમાં વેસ્ટર્ન ડિસ્ટર્બન્સ અને બદલાતા હવામાનની વ્યાપક અસર જોવા મળી રહી છે. રાજસ્થાન, ઉત્તરાખંડ, ઉત્તર પ્રદેશ, મધ્ય પ્રદેશ અને બિહાર સહિતના રાજ્યોમાં ભારે વરસાદ, કરા પડવા અને હિમવર્ષાના કારણે તાપમાનમાં મોટો ઘટાડો નોંધાયો છે. હવામાન વિભાગ દ્વારા અનેક વિસ્તારોમાં હજુ પણ વરસાદ અને વાવાઝોડાનું એલર્ટ આપવામાં આવ્યું છે.

રાજસ્થાનમાં વેસ્ટર્ન ડિસ્ટર્બન્સની અસરથી સાતથી વધુ જિલ્લાઓમાં ભારે વરસાદ સાથે કરા પડ્યા હતા, જેના કારણે તાપમાનમાં પાંચ ડિગ્રી સુધીનો ઘટાડો થયો છે અને જયપુરમાં પણ સવારે વરસાદ નોંધાયો હતો. ઉત્તરાખંડના કેદારનાથ, બદરીનાથ અને હેમકુંડ સાહિબ જેવા ઊંચાઈવાળા વિસ્તારોમાં હિમવર્ષા થવાથી શુક્રવારે સવારે કેદારનાથનું તાપમાન માઈનસ 6 ડિગ્રી અને બદરીનાથનું માઈનસ 5 ડિગ્રી સેલ્સિયસ નોંધાયું હતું.

ઉત્તર પ્રદેશમાં હવામાન વિભાગે ૩૭ જિલ્લાઓમાં વરસાદની ચેતવણી આપી છે, જ્યાં કાસગંજમાં વીજળી પડવાથી એક જ પરિવારના ત્રણ લોકોનાં કરુણ મોત થયા છે. આ ઉપરાંત, મધ્ય પ્રદેશમાં સક્રિય સાયક્લોનિક સર્ક્યુલેશનને કારણે ગ્વાલિયર અને ચંબલ સહિતના સંભાગોમાં આગામી ચાર દિવસ સુધી હવામાન બદલાયેલું રહેશે. દિલ્હી-એનસીઆરમાં પણ ભારે વરસાદના કારણે રસ્તાઓ પર પાણી ભરાયા હતા અને નરેલા અનાજ મંડીમાં ખુલ્લામાં પડેલું અનાજ પલળી ગયું હતું.