• અભિજીત દીપકે ગમે ત્યારે ધરપકડ થવાની આશંકા વ્યક્ત કરી.

• સેન્ટ્રલ પાર્કને બે દિવસ માટે બંધ રાખવામાં આવ્યું.

• ચૂંટણી કમિશનરના રાજીનામાની માગ સાથે વિરોધ પ્રદર્શન.

 સિટી ન્યુઝ @ નવી દિલ્હી

નવી દિલ્હીના કનોટ પ્લેસ સ્થિત સેન્ટ્રલ પાર્ક ખાતે શુક્રવારે સાંજે ૫ વાગ્યે કોકરોચ જનતા પાર્ટી (CJP) દ્વારા ‘તિરંગો લહેરાવો’ રેલીનું આયોજન કરવામાં આવ્યું છે. મુખ્ય ચૂંટણી કમિશનર જ્ઞાનેશ કુમારના રાજીનામાની માગ અને આશુતોષ રાંકા તથા સૌરવ દાસને ન્યાયિક કસ્ટડીમાં મોકલવાના નિર્ણય સામે વિરોધ નોંધાવવા માટે આ રેલી યોજાનાર છે. જોકે, કનોટ પ્લેસ અને આસપાસના વિસ્તારોમાં BNSSની કલમ ૧૬૩ લાગુ કરવામાં આવી છે અને નવી દિલ્હી મ્યુનિસિપલ કાઉન્સિલ (NDMC) દ્વારા સુરક્ષા અને વ્યવસ્થાના ભાગરૂપે સેન્ટ્રલ પાર્કને ૧૬ અને ૧૭ ઑક્ટોબરે સામાન્ય લોકો માટે બંધ રાખવાનો નિર્ણય લેવામાં આવ્યો છે.

આ સંવેદનશીલ સ્થિતિને ધ્યાનમાં રાખીને દિલ્હીમાં વ્યાપક સ્તરે સુરક્ષા વ્યવસ્થા ગોઠવવામાં આવી છે અને ૨૮,૦૦૦ જેટલા સુરક્ષાકર્મીઓને તૈનાત કરવામાં આવ્યા છે. બીજી તરફ, CJPના સ્થાપક અભિજીત દીપકેએ ગત મધરાત્રે પ્રેસ કોન્ફરન્સ યોજીને પોતાની ધરપકડની પ્રબળ આશંકા વ્યક્ત કરી છે. તેમણે સોશિયલ મીડિયા પર સાદા કપડાંમાં પોલીસકર્મીઓ દ્વારા પીછો કરવામાં આવતો હોવાના આક્ષેપો સાથે જણાવ્યું હતું કે જો દેશમાં તિરંગો લહેરાવવા માટે જેલ જવું પડે, તો તેઓ તેના માટે સંપૂર્ણપણે તૈયાર છે.