• પાંચમા નોરતે વિસ્થાપિતો માટે દિવાળી જેવું પર્વ.

• નાયબ મુખ્યમંત્રી હર્ષ સંઘવીએ પ્રમાણપત્રો સોંપ્યા.

• વર્ષોના સંઘર્ષ બાદ ગર્વથી નાગરિકો બન્યા.

 સિટી ન્યુઝ @ રાજકોટ

રાજકોટના પ્રમુખસ્વામી ઓડિટોરિયમ ખાતે પાકિસ્તાનમાંથી વિસ્થાપિત થયેલા 319 લોકોને ભારતીય નાગરિકતા પ્રમાણપત્ર એનાયત કરવાનો ભવ્ય સમારોહ યોજાયો હતો. નાયબ મુખ્યમંત્રી હર્ષ સંઘવીએ "મુસ્કુરાઈએ આજ સે આપ સબ ભારત કે નાગરિક હૈ.." ના શબ્દો સાથે વિસ્થાપિતોને નાગરિકતા સોંપતાની સાથે જ સમગ્ર સભામાં ભારે ભાવુક માહોલ સર્જાયો હતો અને ઉપસ્થિત લોકોની આંખો હર્ષના આંસુથી છલકાઈ ગઈ હતી.

આ કાર્યક્રમમાં રાજકોટ જિલ્લાના 259, મોરબીના 53, કચ્છના 6 અને સુરેન્દ્રનગરના 1 નાગરિકો સહિત કુલ 319 લોકોને પ્રમાણપત્રો આપવામાં આવ્યા હતા. વિસ્થાપિત પરિવારો માટે શારદીય નવરાત્રીનો આ પાવન દિવસ દિવાળીના તહેવાર સમાન સાબિત થયો હતો, કારણ કે વર્ષોની યાતનાઓ અને સંઘર્ષ બાદ હવે તેઓ પોતાના સાચા નામે આજીવન વટભેર જીવી શકશે.

પાકિસ્તાનના થરપારકર અને હૈદરાબાદમાં અત્યાચાર સહન કરીને ભારત આશ્રય લેનાર નાગરિકોએ પોતાની આપવીતી વર્ણવતા સરકારનો આભાર માન્યો હતો. આ પ્રસંગે એક કિશોરીએ નાયબ મુખ્યમંત્રીના ભાલે કુમકુમ તિલક કરીને હાથમાં રાખડી બાંધીને આભારની લાગણી વ્યક્ત કરી હતી, જેણે આ સમગ્ર આયોજનને વધુ ભાવનાત્મક બનાવી દીધું હતું.

સાંસદ પરશોત્તમ રૂપાલાએ સી.એ.એ. (CAA) કાયદાને કેન્દ્ર સરકારનો અત્યંત માનવતાવાદી અભિગમ ગણાવ્યો હતો અને સ્પષ્ટ કર્યું હતું કે આ કાયદો કોઈની નાગરિકતા છીનવવા માટે નહીં પરંતુ વર્ષો પહેલાં નિરાધાર બનેલા લોકોને સન્માન આપવા માટે છે. સેન્સસ ઓપરેશન્સના ડિરેક્ટર સુજલ મયાત્રાએ જણાવ્યું હતું કે ગુજરાતમાં આ કાયદા હેઠળ 1500થી વધુ લોકોને નાગરિકતા પ્રદાન કરવામાં આવી ચૂકી છે.

કાર્યક્રમના અંતે રાજકોટ જિલ્લા કલેક્ટર ડૉ. ઓમ પ્રકાશે આભારવિધિ કરી હતી અને તમામ લાભાર્થીઓએ વડાપ્રધાન નરેન્દ્ર મોદી તથા રાજ્ય સરકારનો હૃદયપૂર્વક આભાર માન્યો હતો. આ ઐતિહાસિક અવસરે મેયર ડૉ. નેહલ શુક્લ, સાંસદ કેસરીદેવસિંહ ઝાલા તેમજ ધારાસભ્યો અને અગ્રણીઓ મોટી સંખ્યામાં ઉપસ્થિત રહ્યા હતા.

શરણાર્થીઓ માટે નવરાત્રી બની ગઈ અસલી દિવાળી!

 પાકિસ્તાનના પાસપોર્ટ કરતા રાજકોટના ગરબા પાસનું મૂલ્ય વધુ : નાયબ મુખ્યમંત્રીનો કટાક્ષ