23 એપ્રિલ 2026 ના રોજ ખુલ્યા કપાટ; વિજ્ઞાન માટે આજે પણ કોયડો છે ગર્ભગૃહની દિવ્ય જ્યોતિ

 નર-નારાયણના ધ્યાન માટે અહીં કુતરાઓ પણ ભસતા નથી; પૌરાણિક માન્યતા અને ભક્તિનો અનોખો સંગમ

 દેવતાઓ દ્વારા રક્ષિત છે આ પવિત્ર જ્યોત? શ્રદ્ધાળુઓ અને પૂજારીઓની અતૂટ આસ્થાનું કેન્દ્ર

ઉત્તરાખંડના હિમાલયની શિખરો પર બિરાજમાન ભગવાન બદ્રીનાથના કપાટ આજે ૨૩ એપ્રિલ ૨૦૨૬ના રોજ વહેલી સવારે ૬ વાગ્યે વૈદિક મંત્રોચ્ચાર સાથે ખોલી દેવામાં આવ્યા છે. કપાટ ખુલતાની સાથે જ હજારો શ્રદ્ધાળુઓએ જય બદ્રીવિશાલના નાદ સાથે આ દિવ્ય ભૂમિ પર પગ મૂક્યો છે. જોકે, બદ્રીનાથ ધામ સાથે જોડાયેલા કેટલાક ચમત્કારોએ ફરી એકવાર ચર્ચા જગાવી છે.

અખંડ જ્યોતનું વિજ્ઞાન કે ચમત્કાર? બદ્રીનાથ મંદિરનું સૌથી મોટું રહસ્ય તેની અખંડ જ્યોત છે. શિયાળામાં જ્યારે મંદિરના કપાટ ૬ મહિના માટે બંધ થાય છે, ત્યારે પૂજારી ગર્ભગૃહમાં ઘીનો એક દીવો પ્રજ્વલિત કરીને જાય છે. આશ્ચર્યની વાત એ છે કે, ૬ મહિના સુધી બંધ અને અત્યંત ઠંડા વાતાવરણમાં ઓક્સિજનના મર્યાદિત સ્ત્રોત હોવા છતાં, જ્યારે આજે કપાટ ખુલ્યા ત્યારે આ દીવો તેટલો જ પ્રજ્વલિત જોવા મળ્યો હતો. શ્રદ્ધાળુઓ તેને દેવતાઓ દ્વારા પ્રગટાવવામાં આવતી જ્યોત માને છે.

પ્રકૃતિની અનોખી મર્યાદા મંદિર પરિસરમાં અન્ય એક અનુભવ એ છે કે અહીં ક્યારેય કુતરાઓ ભસતા નથી. એવી માન્યતા છે કે નર-નારાયણના ધ્યાનમાં ખલેલ ન પડે તે માટે પશુ-પક્ષીઓ પણ અહીં શાંત રહે છે. વધુમાં, પૌરાણિક કથાઓ મુજબ આ વિસ્તારમાં જોવા મળતા સાપ અને વીંછી પણ કોઈને હાનિ પહોંચાડતા નથી. વિજ્ઞાન ભલે આ વાતોને નકારે, પરંતુ સદીઓથી ચાલતી આ પરંપરા અને અનુભવો ભક્તો માટે ભગવાન વિષ્ણુના સાક્ષાત્ અસ્તિત્વનો પુરાવો છે.