વાર્ષિક ₹30 લાખનો ટેક્સ છતાં સુવિધાના નામે મીંડું- વોર્ડ-1 ની સોસાયટીમાં લાગ્યા પ્રતિબંધના બેનરો

 બિસ્માર રસ્તા અને બંધ સ્ટ્રીટ લાઈટથી સુરક્ષા જોખમમાં; ભાજપના ગઢમાં જ નેતાઓ સામે મોરચો મંડાતા ખળભળાટ

 જયમીન ઠાકર અને મેયરને કરેલી રજૂઆતો એળે ગઈ; પાયાની સુવિધાઓ માટે વલખાં મારતા રહીશો હવે આરપારની લડાઈમાં

રાજકોટ: રાજકોટ મહાનગરપાલિકાની આગામી ચૂંટણીના પડઘમ વાગી રહ્યા છે ત્યારે શહેરના વોર્ડ નંબર 1 માં આવેલી ઓસ્કાર સ્કાય પાર્ક સોસાયટીના રહીશોએ સત્તાધારી પક્ષ ભાજપ સામે સીધો મોરચો માંડ્યો છે. વર્ષોથી પાયાની સુવિધાઓ માટે વલખાં મારતા આ સોસાયટીના અંદાજે 480 ફ્લેટના રહીશોએ એકત્ર થઈને સોસાયટીના નાકે ‘ભાજપના નેતાઓએ પ્રવેશ કરવો નહીં’ તેવા બેનરો લગાવી વિરોધ પ્રદર્શન કર્યું છે. રહીશોની સ્પષ્ટ માંગ છે કે જે નેતાઓ મત માંગવા આવે છે તેમણે પહેલા જૂના કામનો હિસાબ આપવો પડશે.

ઓસ્કાર સ્કાય પાર્કના રહીશોએ પોતાની વ્યથા ઠાલવતા જણાવ્યું હતું કે, તેઓ દર વર્ષે રાજકોટ મહાનગરપાલિકામાં અંદાજે 30 લાખ રૂપિયાથી વધુનો ટેક્સ જમા કરાવે છે. આટલી મોટી રકમ સરકારની તિજોરીમાં જમા કરાવવા છતાં તેમને બદલામાં સારા રસ્તા, ચાલુ સ્ટ્રીટ લાઈટ કે નિયમિત સફાઈ જેવી પાયાની જરૂરિયાતો પણ મળતી નથી. રહીશોનો મુખ્ય આક્ષેપ છે કે મહાનગરપાલિકાના તંત્રને માત્ર ટેક્સ વસૂલવામાં જ રસ છે, જ્યારે સુવિધા આપવાની વાત આવે ત્યારે ફાઈલો આંખ આડા કાન કરી દેવામાં આવે છે.

સ્થાનિક રહેવાસી પ્રશાંત સેજપાલના જણાવ્યા અનુસાર, સોસાયટીના આસપાસના રસ્તાઓ અત્યંત બિસ્માર હાલતમાં છે અને તેને પહોળા કરવાની વર્ષો જૂની રજૂઆતો હજુ પણ પેન્ડિંગ છે. સૌથી મોટો પ્રશ્ન મહિલાઓની સુરક્ષાનો છે, કારણ કે રાત્રિના સમયે મોટાભાગની સ્ટ્રીટ લાઈટો બંધ રહે છે. આ ઉપરાંત, સોસાયટીની બાજુમાં આવેલા સરકારી પ્લોટમાં થયેલા ગેરકાયદે દબાણો દૂર કરવા માટે અનેકવાર લેખિત રજૂઆતો કરવા છતાં તંત્ર દ્વારા કોઈ નક્કર કામગીરી કરવામાં આવી નથી. બાળકો માટે પ્લે-એરિયા કે ગાર્ડન જેવી સુવિધાઓ તો માત્ર કાગળ પર જ રહી ગઈ છે.

રહીશોનો આક્રોશ ખાસ કરીને ભાજપના સ્થાનિક નેતાઓ સામે છે. અગાઉ તેઓએ સ્ટેન્ડિંગ કમિટીના ચેરમેન જયમીન ઠાકર અને મેયર નયનાબેન પેઢડિયાને વ્યક્તિગત રીતે તેમજ આરએમસી (RMC) ના ઓનલાઈન પોર્ટલ પર અનેકવાર ફરિયાદો કરી છે, પરંતુ દરેક વખતે માત્ર પોકળ આશ્વાસનો જ મળ્યા છે. રહીશોએ આક્ષેપ કર્યો કે ગત ચૂંટણીમાં તેમણે ભાજપને ખોબલે ને ખોબલે મત આપ્યા હતા, પણ જીત્યા બાદ નેતાઓ મોઢું બતાવવા પણ તૈયાર નથી. આથી હવે સોસાયટીમાં પ્રચાર માટે આવનારા નેતાઓ માટે પ્રવેશબંધીના પોસ્ટર લગાડવામાં આવ્યા છે.

સોસાયટીના રહીશોએ એકસૂરે ચીમકી ઉચ્ચારી છે કે જો આગામી ટૂંક સમયમાં રસ્તા, લાઈટ અને સફાઈના પ્રશ્નોનું નિરાકરણ નહીં આવે, તો તેઓ માત્ર સ્થાનિક જ નહીં પરંતુ આગામી લોકસભા કે રાજ્યસભાની કોઈ પણ ચૂંટણીમાં સત્તાધારી પક્ષનો બહિષ્કાર કરશે. રાજકોટમાં ચૂંટણી પૂર્વે જ શરૂ થયેલો આ લોકરોષ અન્ય વિસ્તારોમાં પણ પ્રસરે તેવા એંધાણ વર્તાઈ રહ્યા છે. હવે જોવાનું એ રહેશે કે ભાજપની સ્થાનિક નેતાગીરી આ નારાજ મતદારોને મનાવવા માટે શું પગલાં ભરે છે.