સિટી ન્યુઝ @ તહેરાન

અમેરિકાએ હોર્મુઝની સાથે-સાથે ઇરાનની આવકના સૌથી મહત્ત્વના સ્ત્રોત સમાન ખાર્ગ ટાપુને કબ્જે કરવાનો વ્યુહ ઘડી કાઢ્યો છે. ખાર્ગ ટાપુ પરથી ઇરાનની 90% નિકાસ થાય છે, જેના પર અંકુશ મેળવવાથી ઇરાનને મરણતોલ ફટકો પડી શકે છે. આ રણનીતિના ભાગરૂપે અમેરિકાએ મધ્યપૂર્વમાં 50થી વધુ ફાઇટર જેટ મોકલી દીધા છે અને ઇરાન પર મોટાપાયે એરસ્ટ્રાઇક કરવાની પૂરી સંભાવના છે.

અમેરિકાના આક્રમક વલણ સામે ઇરાને પણ કડક પ્રતિક્રિયા આપી છે. ઇરાને ચેતવણી ઉચ્ચારી છે કે જો અમેરિકા તેની ધરતી પર પગ મૂકશે તો એકપણ સૈનિક જીવતો પાછો નહીં જાય. ખાર્ગ ટાપુના બુશહર પ્રાંતથી 55 કિમી દૂર આવેલા આ મહત્ત્વના વિસ્તારમાં ઇરાને પોતાનો ઘેરો વધુ મજબૂત બનાવ્યો છે અને એર ડિફેન્સ તથા મિસાઇલો ગોઠવી દીધા છે.

આ યુદ્ધ હવે વધુ ભીષણ બની રહ્યું છે અને જોર્ડનમાં તાજેતરના હુમલામાં વધુ એક અમેરિકન સૈનિક માર્યો જવાથી કુલ મૃત્યુઆંક 17 પર પહોંચી ગયો છે. અમેરિકાની સેન્ટ્રલ કમાન્ડે આના જવાબમાં ઇરાનના લશ્કરી થાણાઓ અને મિસાઇલ યુનિટ્સને નિશાન બનાવ્યા છે, જેના કારણે ખાડી દેશોમાં ભારે હડકંપ મચી ગયો છે.

ઇરાનનું ઊર્જા કેન્દ્ર અને વ્યૂહાત્મક સ્થિતિ

ખાર્ગ ટાપુ ઇરાનના એનર્જી સેક્ટરનો મુખ્ય ગઢ માનવામાં આવે છે જ્યાંથી દેશની મોટાભાગની ક્રૂડ ઓઇલ નિકાસ થાય છે. અમેરિકા દ્વારા આ ટાપુ અને હોર્મુઝ પર નિયંત્રણ મેળવવામાં આવે તો ઇરાનની આર્થિક કરોડરજ્જુ તૂટી શકે છે, જેના કારણે બંને દેશો વચ્ચેનો આ સંઘર્ષ હવે નિર્ણાયક તબક્કામાં પહોંચી ગયો છે.