પાકિસ્તાનના ખૈબર પખ્તુનખ્વા પ્રાંતના બાજોર વિસ્તારમાં આવેલા એક સૈન્ય કેમ્પ પર મોટો આતંકવાદી હુમલો થયો છે. આ હુમલામાં અત્યાર સુધીમાં 15 સૈનિકોના મોત થયા હોવાના સમાચાર મળી રહ્યા છે. આતંકીઓએ અત્યંત સુનિયોજિત રીતે સૌથી પહેલા સૈન્ય સુવિધા ધરાવતા હિસ્સામાં એક શક્તિશાળી આત્મઘાતી વિસ્ફોટ કર્યો હતો, જેનો અવાજ કિલોમીટરો સુધી સંભળાયો હતો. આ ધડાકાને કારણે સર્જાયેલી અફરાતફરીનો લાભ ઉઠાવીને હથિયારધારી આતંકવાદીઓ કેમ્પની અંદર ઘૂસી ગયા હતા.

આતંકવાદી સંગઠન તહરીક-એ-તાલિબાન પાકિસ્તાન (TTP) એ સત્તાવાર રીતે આ હુમલાની જવાબદારી સ્વીકારી છે. સંગઠને જારી કરેલા નિવેદન મુજબ, આ હુમલો તેમની 'સ્પેશિયલ ઇસ્તશહાદી ફોર્સીસ' (SIF) દ્વારા પાર પાડવામાં આવ્યો છે. નોંધનીય છે કે, ઓક્ટોબર 2025 માં ક્વેટામાં થયેલા ભીષણ હુમલા બાદ આ પ્રથમ એવી ઘટના છે જેમાં TTP એ આટલા મોટા આત્મઘાતી હુમલાની જવાબદારી જાહેરમાં સ્વીકારી હોય. આ ઘટના પાકિસ્તાની સુરક્ષા એજન્સીઓ માટે ચિંતાનો વિષય બની છે.

ધડાકા બાદ કેમ્પની અંદર ઘૂસી ગયેલા આતંકીઓ અને પાકિસ્તાની સુરક્ષા દળો વચ્ચે લાંબો સમય સુધી સામસામી અથડામણ ચાલી હતી. સેના દ્વારા આ ઓપરેશનમાં વધારાની કુમક બોલાવવી પડી હતી. આ અથડામણમાં સૈનિકોની સાથે કેટલાક આતંકીઓ પણ માર્યા ગયા હોવાના અહેવાલ છે, જોકે હજુ સુધી આંકડાઓની સત્તાવાર પુષ્ટિ કરવામાં આવી રહી છે. વિસ્ફોટને કારણે સૈન્ય કેમ્પની ઇમારતોને પણ વ્યાપક નુકસાન પહોંચ્યું છે.

ખૈબર પખ્તુનખ્વા પ્રાંતમાં માત્ર એક અઠવાડિયાની અંદર આ બીજો મોટો આત્મઘાતી હુમલો છે. આ અગાઉ મંગળવારે લક્કી મરવત જિલ્લાના નૌરંગ બજારમાં વિસ્ફોટક ભરેલી ઓટોરિક્ષા દ્વારા બ્લાસ્ટ કરવામાં આવ્યો હતો, જેમાં પોલીસકર્મીઓ અને એક મહિલા સહિત અનેક લોકોએ જીવ ગુમાવ્યા હતા. ચાલુ વર્ષના ફેબ્રુઆરી મહિનામાં પણ આ જ પ્રાંતમાં થયેલા હુમલામાં 5 પોલીસકર્મીઓ શહીદ થયા હતા, જે દર્શાવે છે કે આ વિસ્તારમાં આતંકી પ્રવૃત્તિઓ ચરમસીમાએ પહોંચી છે.

સતત વધી રહેલા આત્મઘાતી હુમલાઓને પગલે પાકિસ્તાન સરકાર અને સેના પર દબાણ વધી રહ્યું છે. બાજોર હુમલા બાદ સમગ્ર પ્રાંતમાં સુરક્ષા વ્યવસ્થા અત્યંત કડક કરી દેવામાં આવી છે અને અફઘાનિસ્તાન સરહદ નજીકના વિસ્તારોમાં સર્ચ ઓપરેશન તેજ કરવામાં આવ્યું છે. સ્થાનિક રહીશોમાં પણ ભયનો માહોલ છે, કારણ કે આતંકીઓ હવે સીધા સૈન્ય મથકોને નિશાન બનાવી રહ્યા છે. વહીવટી તંત્ર દ્વારા ઘાયલ સૈનિકોને નજીકની લશ્કરી હોસ્પિટલમાં ખસેડવામાં આવ્યા છે, જ્યાં કેટલાકની હાલત ગંભીર જણાવાઈ રહી છે.