ટ્રમ્પ ઈઝરાયલના દબાણમાં હોવાનો ઈરાનનો દાવો- તેલની પાઈપલાઈન ઉડાવી દેવાની ધમકી બાદ સરહદો પર હલચલ તેજ

ઇબ્રાહિમ રેઝાઈનો પાડોશી દેશ પર પ્રહાર- શાંતિ મંત્રણાના નામે અમેરિકાના હિતો રક્ષાતા હોવાનો ગંભીર આક્ષેપ

 F-5 લડાકુ વિમાનનો ચમત્કાર કે અમેરિકાની નિષ્ફળતા? પશ્ચિમ એશિયાના 7 દેશોમાં અમેરિકન મથકોને બનાવાયા નિશાન

વોશિંગ્ટન: મધ્ય-પૂર્વમાં અમેરિકા અને ઈરાન વચ્ચેનો સંઘર્ષ હવે સીમાચિહ્નરૂપ તબક્કે પહોંચ્યો છે. ઈરાનની સંસદના રાષ્ટ્રીય સુરક્ષા આયોગના સભ્ય અલી ખેજરિયાને ગંભીર ચેતવણી આપી છે કે અમેરિકન પ્રમુખ ડોનાલ્ડ ટ્રમ્પ ઈઝરાયલના પ્રભાવ હેઠળ આવીને કોઈપણ ક્ષણે ઈરાન પર લશ્કરી હુમલો કરી શકે છે. આ ક્ષેત્રમાં અમેરિકન સૈન્યની વધતી તહેનાતી અને ટ્રમ્પ દ્વારા તેલની પાઈપલાઈન ઉડાવી દેવાની ધમકીએ યુદ્ધની સ્થિતિ વધુ સ્ફોટક બનાવી દીધી છે.

આ વિવાદમાં પાકિસ્તાનની ભૂમિકાને લઈને પણ ઈરાને આકરું વલણ અપનાવ્યું છે. ઈરાની સાંસદ ઇબ્રાહિમ રેઝાઈએ પાકિસ્તાનને મધ્યસ્થી માટે અયોગ્ય ગણાવતા કહ્યું કે, પાકિસ્તાન હંમેશા અમેરિકા અને ટ્રમ્પના હિતોનું ધ્યાન રાખે છે. તેમણે દાવો કર્યો કે પાકિસ્તાન પાસે મધ્યસ્થતા માટે જરૂરી તટસ્થતાનો અભાવ છે. બીજી તરફ, ટ્રમ્પે હવે મંત્રણા માટે પોતાના દૂતો મોકલવાનું બંધ કરી દીધું છે અને સ્પષ્ટ કર્યું છે કે ઈરાન સાથે જે પણ વાત થશે તે માત્ર ફોન પર જ થશે.

ચોંકાવનારા અહેવાલ મુજબ, ૨૮ ફેબ્રુઆરીથી ચાલી રહેલી જવાબી કાર્યવાહીમાં ઈરાને પશ્ચિમ એશિયાના સાત દેશોમાં આવેલા અમેરિકન સૈન્ય મથકો અને રડાર સિસ્ટમને નિશાન બનાવીને અબજો ડોલરનું નુકસાન પહોંચાડ્યું છે. આ યુદ્ધમાં સૌથી વધુ ચર્ચા ઈરાનના એક જૂના એફ-૫ (F-5) લડાકુ વિમાનની થઈ રહી છે, જેણે અમેરિકાની આધુનિક મિસાઈલ ડિફેન્સ સિસ્ટમને પરાસ્ત કરીને સફળતાપૂર્વક હુમલો કર્યો છે. આ બાબત વોશિંગ્ટન માટે સૈન્ય સ્તરે મોટી શરમજનક સ્થિતિ માનવામાં આવી રહી છે.

હાલમાં ઈરાને અમેરિકા સાથેની તમામ પ્રકારની શાંતિ વાટાઘાટો સ્થગિત કરી દીધી છે. ટ્રમ્પના દાવા મુજબ હવે તમામ પસંદગીઓ તેહરાનના હાથમાં છે, પણ બીજી તરફ ઈરાની નેતૃત્વ યુદ્ધ માટે સજ્જ હોવાના સંકેતો આપી રહ્યું છે. જો આગામી દિવસોમાં હુમલો શરૂ થાય તો તેની સીધી અસર વૈશ્વિક ક્રૂડ તેલના ભાવ અને ભારત સહિતના દેશોની અર્થવ્યવસ્થા પર પડી શકે છે.