પરિણામોના 24 કલાક પહેલા જ પક્ષને ઝટકો- ફેસબુક પર કરી જાહેરાત; શું આંતરિક અસંતોષ કે સામાજિક જવાબદારી?

 ચૂંટણીની જવાબદારી નિભાવ્યા બાદ અચાનક વિદાય- મનોજ સોરઠિયાએ કહ્યું, "તેઓ જવાબદારીમાંથી મુક્ત થવા માંગતા હતા"

 થોડા દિવસ પહેલા ભાજપ પર કર્યા હતા આકરા પ્રહાર અને આજે રાજીનામું- ખેડૂત વર્ગમાં પકડ ધરાવતા નેતાની અચાનક વિદાય

ગુજરાત સ્થાનિક સ્વરાજ્યની ચૂંટણીના પરિણામો અને મતગણતરી આડે જ્યારે હવે માત્ર ૨૪ કલાકનો સમય બાકી રહ્યો છે, ત્યારે આમ આદમી પાર્ટી (AAP) માટે માઠા સમાચાર સામે આવ્યા છે. પક્ષના પ્રદેશ ઉપાધ્યક્ષ અને જાણીતા ખેડૂત નેતા સાગર રબારીએ અચાનક જ પક્ષના તમામ હોદ્દાઓ પરથી રાજીનામું આપી દેતા રાજકીય ગરમાવો આવ્યો છે. સાગર રબારી ખેડૂત વર્ગ અને પાયાના કાર્યકરોમાં ખૂબ જ મજબૂત પકડ ધરાવતા હોવાથી તેમનું આ પગલું પક્ષ માટે મોટો આંચકો માનવામાં આવે છે. તેમણે સોશિયલ મીડિયા ફેસબુકના માધ્યમથી આ રાજીનામાની જાહેરાત કરી છે.

સાગર રબારીનો ઈતિહાસ આંદોલનકારી નેતા તરીકેનો રહ્યો છે. તેમણે અર્થશાસ્ત્રમાં સ્નાતક અને પત્રકારત્વમાં ડિપ્લોમા કર્યું છે. ૧૯૮૪માં જાણીતા કર્મશીલ ચુનીભાઈ વૈદ્ય સાથે જોડાઈને તેમણે પોતાની કારકિર્દીની શરૂઆત કરી હતી. જમીન સંપાદન અને ખેડૂતોના પ્રશ્નોને લઈને તેઓ હંમેશા સરકાર સામે લડત આપતા રહ્યા છે. મહુવામાં નિરમા પ્લાન્ટ વિરુદ્ધના આંદોલનમાં પણ તેમની ભૂમિકા મહત્વની રહી હતી. પક્ષમાં જોડાયા બાદ તેમણે ઉમેદવારોની પસંદગીથી લઈને ચૂંટણી પ્રચારની તમામ જવાબદારીઓ નિષ્ઠાપૂર્વક નિભાવી હતી.

આ રાજીનામા અંગે પ્રદેશ સંગઠન મહામંત્રી મનોજ સોરઠિયાએ પ્રતિક્રિયા આપતા જણાવ્યું હતું કે, સાગરભાઈ પક્ષના ખૂબ જ નિષ્ઠાવાન સાથી રહ્યા છે. ચૂંટણીની મોટી જવાબદારીઓ તેમણે સફળતાપૂર્વક પૂર્ણ કરી છે. જોકે, તેઓ લાંબા સમયથી સામાજિક સંસ્થાઓ, લેખન કાર્ય અને અન્ય આંદોલનો સાથે સંકળાયેલા હોવાથી વારંવાર જવાબદારીમાંથી મુક્ત થવાની ઈચ્છા વ્યક્ત કરતા હતા. પક્ષે તેમની લાગણીને માન આપીને તેમને મુક્ત કર્યા છે અને તેમના સુવર્ણ ભવિષ્ય માટે શુભેચ્છાઓ પાઠવી છે.

ઉલ્લેખનીય છે કે, હજુ થોડા દિવસો પહેલા જ સાગર રબારીએ એક પત્રકાર પરિષદમાં ભારતીય જનતા પાર્ટી પર આકરા પ્રહારો કર્યા હતા. તેમણે આક્ષેપ કર્યો હતો કે ભાજપ ચૂંટણી પહેલા પ્રજાને દબાવવાની કોશિશ કરી રહ્યું છે અને આમ આદમી પાર્ટીના કાર્યકરોની સોશિયલ મીડિયા આઈડી બંધ કરાવી રહ્યું છે. આટલી સક્રિયતા બાદ અચાનક મતગણતરી પૂર્વે જ તેમનું રાજીનામું અનેક તર્ક-વિતર્ક સર્જી રહ્યું છે. પક્ષના અંદરના વર્તુળોમાં એવી પણ ચર્ચા છે કે શું ટિકિટ ફાળવણી કે અન્ય કોઈ આંતરિક મુદ્દે મનદુઃખ થયું છે કે કેમ.

સાગર રબારીનું જવું એ આપ માટે ખાસ કરીને ખેડૂત મતબેંક સાચવવાના પ્રયાસોને અસર કરી શકે છે. મતગણતરી બાદ જ્યારે પક્ષના પ્રદર્શનનું વિશ્લેષણ કરવામાં આવશે ત્યારે આ રાજીનામાની અસર પણ ચોક્કસપણે ચર્ચામાં રહેશે. હાલ તો આમ આદમી પાર્ટી આશ્વસ્ત છે કે સાગર રબારી પક્ષને જ્યારે પણ જરૂર પડશે ત્યારે માર્ગદર્શન આપતા રહેશે. હવે જોવાનું એ રહેશે કે સાગર રબારી આગામી દિવસોમાં કોઈ નવા રાજકીય પક્ષમાં જોડાય છે કે પછી ફરીથી સંપૂર્ણપણે સામાજિક આંદોલનોમાં સક્રિય થાય છે.