સિટી ન્યુઝ @ રાજકોટ

આજના આધુનિક યુગમાં સતત દોડધામ અને કારકિર્દીની સ્પર્ધા વચ્ચે 'સ્લીપ ડિસઓર્ડર' એટલે કે પૂરતી ઊંઘ ન મળવાની સમસ્યા એક ગંભીર પડકાર બનીને ઉભરી છે. ઉપરથી નાની લાગતી આ તકલીફ હકીકતમાં દાંપત્યજીવન અને વ્યક્તિગત સંબંધોને વેરવિખેર કરી રહી છે. બ્રિટિશ સ્લીપ સોસાયટીના એક અભ્યાસ મુજબ, લગભગ 66 ટકા લોકોએ સ્વીકાર્યું છે કે ઊંઘની બીમારીઓ તેમના સંબંધોને ખતમ કરી રહી છે, જેને કારણે અનેક જીવનસાથીઓએ અલગ રૂમમાં સૂવાની ફરજ પડી રહી છે.

ઊંઘને લગતી સૌથી સામાન્ય બીમારી 'સ્લીપ એપ્નોઈયા' છે, જેમાં રાત્રે વારંવાર શ્વાસમાં ખલેલ પહોંચવાને કારણે વ્યક્તિને પૂરતો ઓક્સિજન મળતો નથી. આ રોગના કારણે નસકોરાં બોલાવવા, ઊંઘમાં ચાલવું, સતત થાક અને ડિપ્રેશન જેવા લક્ષણો જોવા મળે છે. ડોક્ટરોના મતે, ઘણા લોકો આ સમસ્યાને માત્ર એક જોક કે સામાન્ય વાત સમજીને અવગણે છે, પરંતુ તે હાર્ટએટેક, સ્ટ્રોક અને હાઈપરટેન્શન જેવી જીવલેણ બીમારીઓને આમંત્રણ આપી શકે છે. એપ્નોઈયાથી પીડાતા લોકોમાં અકસ્માત થવાની શક્યતા 12 ગણી વધી જાય છે.

કેમ્બ્રિજની પેપવર્થ હોસ્પિટલના નિષ્ણાતો માને છે કે આધુનિક સામાજિક વ્યવસ્થા અને સતત કામના દબાણને કારણે લોકો પોતાની ઊંઘની સમસ્યાને છુપાવે છે અને ઈલાજ માટે ડોક્ટર પાસે જવાનું ટાળે છે. પરંતુ ઊંઘનો સતત અભાવ માત્ર કારકિર્દી જ નહીં, પરંતુ માનવીય સંબંધોને પણ મુશ્કેલીમાં મૂકી રહ્યો છે. આ એક ગંભીર સમસ્યા છે અને તે અંગે જનજાગૃતિ લાવવી તેમજ ડોક્ટરો તથા નર્સોને આ બાબતે વધુ સજાગ કરવા અત્યંત જરૂરી છે.

ઊંઘની સમસ્યાઓ અને તેનાથી બચવા શું ધ્યાન રાખવું? ઊંઘને લગતી સમસ્યાઓ ડાયાબિટીસ જેટલી જ વ્યાપક અને અસ્થમા કરતાં બમણી ગંભીર છે. સ્લીપ એપ્નોઈયા જેવી બીમારીને નજરઅંદાજ કરવાથી હૃદયની ગંભીર બીમારીઓ અને માનસિક તણાવ વધે છે. આધુનિક જીવનશૈલીના દબાણ વચ્ચે સ્વાસ્થ્ય સાથે સમાધાન ન કરવું જોઈએ. જો લાંબા સમય સુધી સતત થાક, નસકોરાં કે ઊંઘમાં ખલેલ અનુભવાતી હોય, તો તેને સામાન્ય ગણવાને બદલે તાત્કાલિક નિષ્ણાત ડોક્ટરની સલાહ લેવી જોઈએ. સાચી જાગૃતિ અને યોગ્ય ઈલાજથી તમે માત્ર તમારું સ્વાસ્થ્ય જ નહીં, પણ તમારા સંબંધોને પણ બચાવી શકો છો.