સિટી ન્યુઝ @ લાઈફ સ્ટાઈલ 

આજના ડિજિટલ યુગમાં બાળકોનું ઘડતર એક મોટા પડકારરૂપ બન્યું છે. ડિજિટલ ઉપકરણો શિક્ષણ અને સંવાદ માટે આશીર્વાદરૂપ હોવા છતાં, સોશિયલ મીડિયા અને આર્ટિફિશિયલ ઇન્ટેલિજન્સ જેવી ટેક્નોલોજી બાળકોના કુમળા માનસને રી-પ્રોગ્રામ કરી રહી છે. નિષ્ણાતોના મતે, સોશિયલ મીડિયા દ્વારા બાળકો યોગ્ય બાબતો શીખવાને બદલે અયોગ્ય સામગ્રી તરફ વધુ આકર્ષાઈ રહ્યા છે. વિશ્વના વિકસિત દેશો પણ હવે સ્વીકારી રહ્યા છે કે બાળકોની ઓનલાઇન સુરક્ષા માત્ર વાલીઓનો પ્રશ્ન નથી, પરંતુ તે એક ગંભીર પબ્લિક હેલ્થ-ઇશ્યુ બની ચૂકી છે.

ટેક્નોલોજીની દુનિયા તટસ્થ નથી, તે ખાસ પ્રકારના એલ્ગોરિધમથી સંચાલિત છે જે માત્ર વપરાશકર્તાનું ધ્યાન ખેંચવા પર કેન્દ્રિત હોય છે. હિંસક અને સેક્સ્યુઅલાઈઝ્ડ કન્ટેન્ટ વારંવાર બાળકોની સામે આવવાથી તેમની વિશ્વની સમજ વિકૃત થઈ શકે છે. ફ્રાન્સના રાષ્ટ્રપતિ જેવા વિશ્વના નેતાઓ પણ ચેતવણી આપી રહ્યા છે કે સોશિયલ મીડિયાના આ જોખમોને રોકવા માટે હવે માત્ર ચર્ચા નહીં, પરંતુ કડક અને નક્કર પગલાં લેવાનો સમય આવી ગયો છે. પર્સનલ ડેટાના સંગ્રહ અને ટાર્ગેટેડ માર્કેટિંગના કારણે બાળકોની પ્રાઇવસી પણ જોખમમાં છે.

આપણો દેશ ભૂલકાઓમાંથી ભવ્યતાના સર્જન માટે જાણીતો છે, ત્યારે આ દિશામાં લેટ ઇનિશ્યેટિવ સિન્ડ્રોમમાંથી બહાર આવવું જરૂરી છે. વાલીઓએ હવે બાળકોને ટેક્નોલોજીના ગુલામ બનાવવાને બદલે તેમને ડિજિટલ સાક્ષરતા આપવાની શરૂઆત કરવી પડશે. સોશિયલ મીડિયા અંગે આપણે આજે જે નિર્ણયો લઈશું, તેની સીધી અસર આગામી પેઢીના વિકાસ પર પડશે. બાળકોને ટેક્નોલોજી સાથે જોડેલા રાખવા સાથે તેના સંભવિત નુકસાનોથી બચાવવા માટે અત્યારથી જ પ્રિવેન્ટિવ સ્ટેપ્સ ભરવા અનિવાર્ય છે.

ડિજિટલ સાવચેતી

બાળકોની ઓનલાઇન સુરક્ષા માટે જરૂરી પગલાં બાળકોને ડિજિટલ જોખમોથી બચાવવા માટે વાલીઓએ સક્રિય ભૂમિકા ભજવવી જોઈએ. સ્ક્રીન ટાઈમ પર નિયંત્રણ રાખવું અને બાળકો સાથે નિયમિત સંવાદ કરવો ખૂબ જ જરૂરી છે. હિંસક કે અયોગ્ય કન્ટેન્ટ ધરાવતી વેબસાઇટ્સ અને ગેમ્સ પર પેરન્ટલ કંટ્રોલ ટૂલ્સનો ઉપયોગ કરવો જોઈએ. ડિજિટલ દુનિયાના એલ્ગોરિધમ કેવી રીતે કામ કરે છે તે વિશે બાળકોને જાગૃત કરવાથી તેઓ સુરક્ષિત રહી શકે છે. વાસ્તવિક દુનિયાની પ્રવૃત્તિઓમાં બાળકોને વધુ વ્યસ્ત રાખવાથી તેમનામાં રચનાત્મક વિકાસ થશે.