• સામાન્ય બેઠકો ઘટીને 22 થતા મહારથીઓમાં ફફડાટ - પૂર્વ મેયરથી લઈને સ્ટેન્ડિંગ ચેરમેન સુધીના નેતાઓ માટે ટિકિટ બચાવવી મુશ્કેલ
• 50 બેઠકો અનામત રહેતા ઓપન કેટેગરીમાં જંગ જામશે - પૂર્વ મેયર નયનાબેન પેઢડિયા માટે પતિનું ગેરકાયદે બાંધકામ નડી શકે
• વોર્ડ નં. 2 માં જયમીન ઠાકર કે મનીષ રાડિયામાંથી કોણ થશે આઉટ? - ધારાસભ્ય ભાનુબેન અને દર્શીતાબેન ચૂંટણી લડે તેવી શક્યતા ઓછી

રાજકોટ મહાનગરપાલિકાની ચૂંટણીના ઢોલ વાગતાની સાથે જ રાજકીય ગલિયારાઓમાં ગરમાવો આવી ગયો છે. રાજ્ય ચૂંટણી પંચ દ્વારા જાહેર કરાયેલા નવા રોટેશન મુજબ, 72 માંથી 50 બેઠકો અનામત થતા હવે સામાન્ય જ્ઞાતિના ઉમેદવારો માટે માત્ર 22 બેઠકો જ બચી છે. આ સ્થિતિમાં ભાજપના અનેક દિગ્ગજ નેતાઓ અને પૂર્વ પદાધિકારીઓને પોતાનો વોર્ડ બદલવો પડશે અથવા તો ટિકિટ ગુમાવવી પડશે.

વોર્ડ નંબર 4 અને 15 પર સૌની નજર વોર્ડ નંબર 4 માં પૂર્વ મેયર નયનાબેન પેઢડિયા સામે તેમના પતિના વિવાદિત બાંધકામનો મુદ્દો ડેમેજ કંટ્રોલ માટે તેમની ટિકિટ કાપી શકે છે. બીજી તરફ, વોર્ડ નંબર 15 માં કોંગ્રેસનું મજબૂત વર્ચસ્વ હોવાથી ભાજપે અહીં ચાર નવા અને આક્રમક ચહેરાઓ મેદાનમાં ઉતારવા પડશે. ઓબીસી અનામત 27% થવાને કારણે સામાન્ય જ્ઞાતિના ઉમેદવારોમાં "કોણ ફાવશે?" તે બાબતે અત્યારથી જ લોબિંગ શરૂ થઈ ગયું છે.

સીનિયરોની એક્ઝિટ અને નવા ચહેરાઓની એન્ટ્રી વોર્ડ નંબર 7 માં દેવાંગ માંકડ અને નેહલ શુકલ જેવા સીનિયર નેતાઓ માટે પણ આ વખતની ચૂંટણી પડકારરૂપ છે. ઘણા કોર્પોરેટરો હવે પોતાની જગ્યાએ પરિવારના સભ્યો (પુત્ર કે પુત્રવધૂ) માટે ટિકિટ માંગી રહ્યા છે. આગામી દિવસોમાં જ્યારે પક્ષ દ્વારા સત્તાવાર યાદી જાહેર થશે, ત્યારે બળવો કે નારાજગીના સૂર ઉઠશે તે પણ નિશ્ચિત જણાય છે.