સિટી ન્યૂઝ @ રોમ : ઇટાલીના વડાપ્રધાન જ્યોર્જિયા મેલોનીએ તાજેતરમાં પોતાની અશ્લીલ ડીપફેક તસવીરો સોશિયલ મીડિયા પર વાયરલ થવા મુદ્દે આકરો વાંધો ઉઠાવ્યો છે. આર્ટિફિશિયલ ઇન્ટેલિજન્સ (AI) દ્વારા બનાવવામાં આવેલી આ નકલી તસવીરોએ સમગ્ર વિશ્વમાં ચકચાર મચાવી દીધી છે. પીએમ મેલોનીએ સ્પષ્ટતા કરતા જણાવ્યું હતું કે, આ તસવીરો સંપૂર્ણપણે બનાવટી છે અને કેટલાક લોકો તેને અસલી ગણાવીને શેર કરી રહ્યા છે, જે ગંભીર ચિંતાનો વિષય છે.

વડાપ્રધાન મેલોનીએ સોશિયલ મીડિયા પર પોતાની વ્યથા ઠાલવતા લખ્યું કે, આ દિવસોમાં મારી ઘણી નકલી તસવીરો ફેલાવવામાં આવી રહી છે. તેમણે કટાક્ષ કરતા એમ પણ કહ્યું કે, જેણે આ તસવીરો બનાવી છે તેણે કેટલાક કિસ્સાઓમાં મને વધુ સારી બતાવી છે, પરંતુ ગંભીર વાત એ છે કે હવે લોકો કોઈના પર વ્યક્તિગત હુમલો કરવા અને જૂઠ ફેલાવવા માટે કોઈ પણ હદ વટાવવા તૈયાર થઈ ગયા છે. આ પ્રકારની ટેકનોલોજીનો ઉપયોગ ચારિત્ર્ય હનન માટે થઈ રહ્યો છે.

ડીપફેક ટેકનોલોજીને માનવતા માટે ખતરો ગણાવતા મેલોનીએ ઉમેર્યું કે, આ માત્ર મારા પદ કે વ્યક્તિત્વ વિશે નથી, પરંતુ આ ટેકનોલોજી લોકોને છેતરવા અને ગેરમાર્ગે દોરવા માટે પૂરતી શક્તિશાળી છે. તેમણે કહ્યું કે, "હું તો વડાપ્રધાન તરીકે પોતાનો બચાવ કરી શકું છું અને સત્ય રજૂ કરી શકું છું, પરંતુ સામાન્ય નાગરિકો માટે આ સ્થિતિ ભયાનક હોઈ શકે છે. ઘણા લોકો આવું કરીને પોતાનું સન્માન બચાવી શકતા નથી."

મેલોનીએ દુનિયાભરના લોકોને અપીલ કરતા એક મહત્વપૂર્ણ સલાહ આપી છે. તેમણે કહ્યું કે ડિજિટલ યુગમાં કોઈ પણ માહિતી પર આંધળો ભરોસો કરવો જોખમી છે. લોકોએ પહેલા કોઈ પણ ફોટો કે વીડિયોની તપાસ કરવી જોઈએ, ત્યારબાદ જ તેના પર ભરોસો કરવો જોઈએ. છેલ્લે, પૂરેપૂરી ખાતરી થયા પછી જ તેને અન્ય લોકો સાથે શેર કરવી જોઈએ, કારણ કે આજે આ ઘટના મારી સાથે બની છે, તે કાલે કોઈ પણ સામાન્ય વ્યક્તિ સાથે બની શકે છે.

ઉલ્લેખનીય છે કે ડીપફેક ટેકનોલોજીનો ઉપયોગ કરીને સેલિબ્રિટીઝ અને રાજકીય નેતાઓને નિશાન બનાવવાની ઘટનાઓ વૈશ્વિક સ્તરે વધી રહી છે. ઇટાલીના વડાપ્રધાન દ્વારા ઉઠાવવામાં આવેલા આ અવાજ બાદ હવે યુરોપિયન દેશોમાં AI ના નિયમન અને સાયબર ક્રાઈમ સામે કડક કાયદાઓ ઘડવા અંગેની ચર્ચાઓએ ફરી વેગ પકડ્યો છે. નિષ્ણાતોના મતે, ડીપફેક માત્ર અશ્લીલતા પૂરતું મર્યાદિત નથી, પરંતુ તે લોકશાહી અને સામાજિક શાંતિ માટે પણ મોટો પડકાર છે.