સિટી ન્યૂઝ @ અમદાવાદ: નેશનલ ઇન્વેસ્ટિગેશન એજન્સી (NIA) એ જાહેર સ્થળોએ નિર્દોષ લોકો પર સામૂહિક ઝેર આપીને મોટા પાયે નરસંહાર કરવાના 'બાયો-ટેરરિઝમ' કાવતરામાં પ્રતિબંધિત આતંકવાદી સંગઠન ISIS સાથે જોડાયેલા ત્રણ આરોપીઓ વિરુદ્ધ અમદાવાદની સ્પેશિયલ કોર્ટમાં ચાર્જશીટ દાખલ કરી છે. મુખ્ય આરોપી અને હૈદરાબાદ સ્થિત ડો. સૈયદ અહેમદ મોહિયુદ્દીન તેમજ ઉત્તર પ્રદેશના તેના બે સહ-આરોપીઓ આઝાદ અને મોહમ્મદ સુહેલ વિરુદ્ધ UAPA, BNS અને આર્મ્સ એક્ટની વિવિધ કલમો હેઠળ ગુનો નોંધવામાં આવ્યો છે.

આ આતંકી કાવતરાની સૌથી ચોંકાવનારી વિગત એ છે કે આરોપીઓ એરંડાના બીજમાં કુદરતી રીતે જોવા મળતું અત્યંત શક્તિશાળી જૈવિક ઝેર 'રાઈઝીન' તૈયાર કરી રહ્યા હતા. આ ઝેર સાઇનાઇડ કરતા પણ વધુ ખતરનાક માનવામાં આવે છે અને તે કેમિકલ વેપન્સ કન્વેન્શનના શેડ્યૂલ-I માં સૂચિબદ્ધ છે. વિદેશ સ્થિત ISIS હેન્ડલર્સના માર્ગદર્શન હેઠળ આ આતંકીઓ કટ્ટરપંથી યુવાનોની ભરતી કરવા અને ગેરકાયદેસર હથિયારો તથા જૈવિક ઝેર દ્વારા દેશમાં આતંક ફેલાવવાનું આયોજન કરી રહ્યા હતા.

આ કેસની શરૂઆત નવેમ્બર 2025 માં ગુજરાત ATS દ્વારા કરવામાં આવી હતી, જ્યારે ચીનથી MBBS થયેલા ડો. મોહિયુદ્દીનની એક ટોલ પ્લાઝા પાસેથી ધરપકડ કરાઈ હતી. તેની કારમાંથી ગેરકાયદેસર હથિયારો અને 4 લિટર એરંડાના તેલની બોટલો મળી આવી હતી. તપાસમાં બહાર આવ્યું છે કે ડોક્ટરે હૈદરાબાદમાં પોતાના નિવાસસ્થાનને જ ઝેર તૈયાર કરવા માટેની ગુપ્ત પ્રયોગશાળામાં ફેરવી દીધું હતું. હેન્ડલરે તેને દક્ષિણ એશિયાનો ISIS 'અમીર' બનાવવાનું લાલચભર્યું વચન પણ આપ્યું હતું.

અન્ય બે આરોપીઓ આઝાદ અને સુહેલ વિશેની તપાસમાં જાણવા મળ્યું છે કે તેઓએ રાજસ્થાનના હનુમાનગઢ ખાતે 'ડેડ-ડ્રોપ' સાઇટ પરથી હથિયારો અને ભંડોળ મેળવ્યું હતું. સુહેલ આ કાવતરામાં ભરતી, ફંડિંગ અને હથિયારોના સંચાલન માટે મહત્વની કડી તરીકે કામ કરતો હતો. એટલું જ નહીં, આ આતંકીઓએ હરિદ્વારના મંદિરોમાં પણ રેકી કરી હોવાના પુરાવા મળ્યા છે. સુહેલના ઘરેથી ISIS નો ઝંડો અને અન્ય વાંધાજનક ડિજિટલ દસ્તાવેજો પણ જપ્ત કરવામાં આવ્યા છે.

હાલમાં મુખ્ય આરોપી ડો. અહેમદ મોહિયુદ્દીન સાબરમતી જેલમાં બંધ છે, જ્યાં તેના આતંકી એજન્ડાથી નારાજ અન્ય કેદીઓએ તેના પર હુમલો કર્યો હોવાની ઘટના પણ બની હતી. NIA હાલમાં આ કાવતરામાં સામેલ વિદેશી હેન્ડલર્સ અને અન્ય વ્યક્તિઓની ઊંડી તપાસ કરી રહી છે. ભારતમાં જૈવિક આતંકવાદ (Bio-Terrorism) ના માધ્યમથી મોટી તારાજી સર્જવાનો આ પ્રથમ મોટો પ્રયાસ હોવાનું એજન્સીનું માનવું છે, જેને સમયસર નિષ્ફળ બનાવવામાં સુરક્ષા એજન્સીઓને સફળતા મળી છે.