ઓપનહાઇમર અને બોહેમિયન રેપ્સોડીના રેકોર્ડ્સ ધ્વસ્ત- ક્રિટિક્સ નારાજ પણ બોક્સ ઓફિસ પર જેક્સનનો જાદુ

 જાફર જેક્સનના અભિનયથી દર્શકો મંત્રમુગ્ધ- વિવાદોને કારણે $50 Millionનો વધારાનો ખર્ચ કરીને કરાયું શૂટિંગ

 ટીકાકારોની નારાજગી વચ્ચે પ્રેક્ષકોનો રેકોર્ડબ્રેક પ્રતિસાદ- હવે સીક્વલ અને ત્રીજા ભાગની પણ તૈયારીઓ શરૂ

લેજેન્ડ ઓફ પોપ ગણાતા માઈકલ જેક્સનની બાયોપિક ફિલ્મ 'Michael'એ નબળા રિવ્યૂ અને નિર્માણ દરમિયાનની અનેક મુશ્કેલીઓને પાછળ છોડીને ગ્લોબલ બોક્સ ઓફિસ પર ઇતિહાસ રચી દીધો છે. આ ફિલ્મે તેના પ્રથમ સપ્તાહમાં વિશ્વભરમાં $217 Million (આશરે ₹1800 કરોડથી વધુ) ની કમાણી કરીને અત્યાર સુધીની કોઈપણ બાયોપિક માટે સૌથી મોટી ઓપનિંગનો નવો વર્લ્ડ રેકોર્ડ બનાવ્યો છે. રસપ્રદ વાત એ છે કે આ ફિલ્મે ક્રિસ્ટોફર નોલનની ઓસ્કાર વિજેતા ફિલ્મ 'ઓપનહાઇમર' અને ક્વીન બેન્ડની 'બોહેમિયન રેપ્સોડી' ના ઓપનિંગ રેકોર્ડ્સને પણ ખૂબ જ આસાનીથી ધ્વસ્ત કરી દીધા છે.

જોકે, આ ફિલ્મની સફળતા પાછળ ક્રિટિક્સ અને સામાન્ય જનતાના અભિપ્રાયોમાં મોટો તફાવત જોવા મળ્યો છે. ફિલ્મ સમીક્ષકોએ એવી નારાજગી વ્યક્ત કરી હતી કે માઈકલ જેક્સનના જીવનના વિવાદિત પાસાઓને ફિલ્મમાં પૂરતી જગ્યા આપવામાં આવી નથી, જેને કારણે ‘રોટન ટોમેટોઝ’ જેવી વેબસાઈટ પર તેને ઓછો સ્કોર મળ્યો છે. પરંતુ આ આલોચનાઓની પ્રેક્ષકો પર કોઈ અસર થઈ નથી. સામાન્ય દર્શકો આ ફિલ્મને મન મૂકીને વધાવી રહ્યા છે અને તેને રેકોર્ડબ્રેક પ્રતિસાદ મળી રહ્યો છે, જેનાથી ફિલ્મ સ્ટુડિયો લાયન્સગેટ પણ ચોંકી ઉઠ્યું છે.

ફિલ્મમાં માઈકલ જેક્સનના ભત્રીજા જાફર જેક્સને પોપ કિંગનું પાત્ર ભજવ્યું છે. જાફરે જે રીતે માઈકલના ડાન્સ મૂવ્સ અને તેમની પર્સનાલિટીને પડદા પર જીવંત કરી છે, તેનાથી તમામ ઉંમરના અને દરેક વર્ગના લોકો ભાવનાત્મક રીતે જોડાઈ રહ્યા છે. એડમ ફોગેલસને જણાવ્યું કે દુનિયાભરમાંથી જે પ્રકારનો પ્રતિસાદ મળી રહ્યો છે તે કલ્પના બહારનો છે. આ સફળતા બાદ હવે આ ફિલ્મની સીક્વલ અને કદાચ ત્રીજા ભાગ માટે પણ નિર્માતાઓ દ્વારા ગંભીરતાથી વિચારણા અને તૈયારીઓ શરૂ કરી દેવામાં આવી છે.

આ ફિલ્મનું નિર્માણ કાર્ય પણ અત્યંત વિવાદાસ્પદ અને પડકારજનક રહ્યું હતું. રિપોર્ટ્સ મુજબ, શૂટિંગ પૂર્ણ થયા બાદ નિર્માતાઓને સમજાયું કે ફિલ્મનો ત્રીજો ભાગ જેક્સન સામેના ગંભીર આરોપો પર કેન્દ્રિત હતો, જે કાયદાકીય કરારને કારણે બતાવી શકાય તેમ નહોતો. આ મોટી ભૂલ સુધારવા માટે નિર્માતાઓએ $50 Million નો વધારાનો જંગી ખર્ચ કરીને ફિલ્મના અમુક હિસ્સાનું ફરીથી શૂટિંગ કર્યું હતું. દિગ્દર્શક એન્ટોઈન ફુક્વાએ હવે આ ફિલ્મને 1988 ના વર્ષ પર સમાપ્ત કરી છે, જે કોઈ પણ ગંભીર આરોપો પહેલાનો સુવર્ણ સમયગાળો છે.

ભારત સહિત એશિયાના દેશોમાં પણ માઈકલ જેક્સનના ચાહકો આ ફિલ્મને લઈને ભારે ઉત્સાહમાં છે. આ જંગી સફળતા સાબિત કરે છે કે કોઈ પણ વિવાદ માઈકલ જેક્સનની લોકપ્રિયતાને ડગાવી શકતો નથી. ફિલ્મ સમીક્ષકો ભલે વિવાદો શોધતા હોય, પરંતુ ચાહકો માટે તો આ ફિલ્મ તેમના પોપ સુપરસ્ટારને ફરીથી જીવંત થતા જોવાનો એક ઉત્સવ બની ગઈ છે. આવનારા દિવસોમાં આ ફિલ્મ હજુ પણ કમાણીના અનેક નવા કીર્તિમાન સ્થાપિત કરે તેવી પૂરી શક્યતા છે.