સિટી ન્યુઝ @ નવી દિલ્હી

દેશભરના રાષ્ટ્રીય રાજમાર્ગો (નેશનલ હાઇવે) અને એક્સપ્રેસ-વે પર મુસાફરી કરતા વાહનચાલકો માટે લાંબી કતારો અને ટોલ બૂથનો સમય ટૂંક સમયમાં ભૂતકાળ બની જશે. કેન્દ્ર સરકાર દ્વારા ફાસ્ટેગ (FASTag) ની સફળતા બાદ હવે સમગ્ર દેશમાં સેટેલાઇટ આધારિત ટોલિંગ સિસ્ટમ લાગુ કરવાની તૈયારીઓ આખરી તબક્કામાં પહોંચી ગઈ છે. આ આધુનિક સિસ્ટમ અમલમાં આવતાં જ દેશભરના 1,000 થી વધુ ટોલ પ્લાઝા કાયમ માટે ઇતિહાસ બની જશે અને વાહનો કોઈપણ જાતના બેરિયર વગર સીધા પસાર થઈ શકશે.

સડક પરિવહન અને રાજમાર્ગ મંત્રાલયના જણાવ્યા અનુસાર, ટોલ બેરિયર્સ હટાવી લીધા પછી ખાલી થનારી આશરે 15,000 થી 20,000 એકર જેટલી વિશાળ અને કિંમતી જમીનનો સદુપયોગ કરવા માટે નેશનલ હાઈવે ઓથોરિટી ઓફ ઈન્ડિયા (NHAI) એ એક મહત્વકાંક્ષી માસ્ટરપ્લાન તૈયાર કરી લીધો છે. હવે આ સ્થળો માત્ર મુસાફરીનો એક સાદો સ્ટોપ રહેવાને બદલે દેશના સૌથી મોટા હાઇવે રિટેલ માર્કેટ અને ક્લીન એનર્જી હબ તરીકે ઉભરી આવશે.

આ સમગ્ર પ્રોજેક્ટ અંતર્ગત દેશભરના 1,080 ટોલ પ્લાઝાની જમીનને આધુનિક વે-સાઇડ એમેનિટિઝ (WSA) માં પરિવર્તિત કરવામાં આવશે. NHAI દ્વારા આ જમીનના પ્લોટ્સને ઇન્ફ્રાસ્ટ્રક્ચર ઇન્વેસ્ટમેન્ટ ટ્રસ્ટ (InvIT) અને 30 વર્ષના દીર્ઘકાલીન લીઝ મોડેલ હેઠળ અગ્રણી ખાનગી કંપનીઓને સોંપવામાં આવશે.

આ નવી યોજના હેઠળ હાઇવે કિનારે વિશાળ ફૂડ કોર્ટ્સ, પ્રીમિયમ રેસ્ટોરન્ટ્સ, રિટેલ મોલ્સ, આધુનિક શૌચાલયો અને વિશાળ પાર્કિંગ ઝોન ઊભા કરવામાં આવશે. આ ઉપરાંત તેને ક્લીન એનર્જી કોરિડોર તરીકે વિકસાવવા માટે સોલર પાવર પ્લાન્ટ્સ અને અદ્યતન ઇલેક્ટ્રિક વ્હીકલ (EV) સુપરફાસ્ટ ચાર્જિંગ સ્ટેશન્સ સ્થાપિત કરાશે, જેનાથી મુસાફરોને વૈશ્વિક કક્ષાની સવલતો ઉપલબ્ધ બનશે.

દેશના 1000 ટોલ પ્લાઝા ઇતિહાસ બનશે

હાઇવે પર સેટેલાઇટ આધારિત બેરિયર-મુક્ત ટોલિંગ લાગુ થયા બાદ 1000 થી વધુ ટોલ પ્લાઝા બંધ થશે. NHAI તેનાથી ખાલી થનારી 15 થી 20 હજાર એકર જમીનને 30 વર્ષના લીઝ મોડેલ હેઠળ ખાનગી કંપનીઓને સોંપી રિટેલ અને ક્લીન એનર્જી કોરિડોર તરીકે વિકસાવશે, જ્યાં રેસ્ટોરન્ટ્સ અને ઇવી ચાર્જિંગ સુવિધાઓ મળશે.