FIR થી શરૂ થઈ તપાસ
આ મની લોન્ડરિંગ તપાસ તિરુપતિ પૂર્વ પોલીસ સ્ટેશનમાં નોંધાયેલી પ્રથમ માહિતી અહેવાલ (FIR) પર આધારિત છે. આ FIR TTD ને ભેળસેળવાળા ઘીની ખરીદી અને સપ્લાય સંબંધે ગુનાહિત કાવતં, છેતરપિંડી, બનાવટ (ફોર્જરી) અને ભ્રષ્ટાચારના આરોપો સાથે સંકળાયેલી છે.

ગાયના ઘીના નામે વનસ્પતિ તેલ અને રસાયણો
અહેવાલ અનુસાર, કથિત ભેળસેળવાળું ઘી અસલ ગાયના ઘીના સ્થાને વનસ્પતિ તેલ અને રાસાયણિક પદાર્થોના મિશ્રણથી તૈયાર કરવામાં આવતું હતું. ANI ના હવાલે ED એ કહ્યું, "ભેળસેળવાળું ઘી કથિત રીતે રિફાઇન્ડ પામ ઓઈલ, પામ કર્નલ ઓઈલ, પામોલિન તથા MG-90, મોનોગ્લિસરાઇડ્સ, માયવાસેટ સોફ્ટ 400 અને એસિટિક એસિડ એસ્ટર સહિતના વિવિધ રસાયણોના ઉપયોગથી બનાવવામાં આવ્યું હતું અને ત્યારબાદ તેને TTD માટે 'એગમાર્ક સ્પેશિયલ ગ્રેડ કાઉ ઘી' તરીકે સપ્લાય કરવામાં આવ્યું હતું.”

સુકૃતિ ફૂડ્સ પ્રાઇવેટ લિમિટેડના પ્રમોટર મંગલાને એજન્સીએ વ્યાપક કાવતરામાં કથિત સહભાગી ગણાવ્યો છે. ED એ કહ્યું કે તેણે "ભેળસેળના પદાર્થોની ખરીદી કરાવી અને પોતાના ફેક્ટરી પરિસરમાં ભેળસેળવાળું ઘી બનાવ્યું.”

ફ્રન્ટ કંપનીઓનું નેટવર્ક
તપાસમાં એવા નેટવર્ક તરફ પણ સંકેત મળે છે જેમાં અનેક સંસ્થાઓ મારફતે ભેળસેળવાળું ઘી સપ્લાય કરવામાં આવ્યું. એજન્સીનો આરોપ છે કે મંગલાએ આ વ્યવહારોના સંકલનમાં ભૂમિકા નિભાવી હતી.

ED અનુસાર, "મંગલાએ શ્રી વૈષ્ણવી ડેરી સ્પેશિયાલિટીઝ પ્રાઇવેટ લિમિટેડ, માલગંગા મિલ્ક એન્ડ એગ્રો પ્રોડક્ટ્સ પ્રાઇવેટ લિમિટેડ અને એ.આર. ડેરી ફૂડ્સ પ્રાઇવેટ લિમિટેડ સહિતની વિવિધ ફ્રન્ટ કંપનીઓ મારફતે ભેળસેળવાળા ઘીની સપ્લાયનું સંકલન પણ કર્યું હતું.

તેણે ઘી અને રિફાઇન્ડ પામ ઓઈલની ખરીદી-વેચાણ સંબંધિત ખોટા રેકોર્ડ પણ તૈયાર કરી જાળવ્યા હતા, જેનો ઉદ્દેશ ભેળસેળના પદાર્થોના વાસ્તવિક ઉપયોગને છુપાવવાનો અને અસલ ગાયના ઘીના કાયદેસર ઉત્પાદન તથા સપ્લાયનો દેખાવ ઊભો કરવાનો હતો.”

આ પહેલાં વિપિન જૈનની ધરપકડ
મંગલાની ધરપકડ પહેલાં ED એ આ જ તપાસ સંબંધે ભોલે બાબા ઓર્ગેનિક ડેરી મિલ્ક પ્રાઇવેટ લિમિટેડના પ્રમોટર અને ડિરેક્ટર વિપિન જૈનની અટકાયત કરી હતી. તપાસકર્તાઓનો આરોપ છે કે જૈન TTD ને ભેળસેળવાળા ઘીના ઉત્પાદન અને સપ્લાયની આ વ્યાપક કાર્યવાહીના મુખ્ય સૂત્રધાર હતા.

તાજેતરની આ ધરપકડ દર્શાવે છે કે એજન્સીની તપાસ ફક્ત ભેળસેળવાળા ઘીના કથિત સપ્લાય સુધી મર્યાદિત નથી, પરંતુ તે ઘટકોની ખરીદી, ઉત્પાદન પ્રક્રિયા, મધ્યસ્થ સંસ્થાઓનો ઉપયોગ અને વ્યવહારો છુપાવવાના ઉદ્દેશથી રાખવામાં આવેલા રેકોર્ડની પણ તપાસ કરી રહી છે.

રૂ. 230 કરોડની કથિત ગેરરીતિ
ED અનુસાર, કથિત ગેરરીતિઓ વર્ષ 2019 થી 2024 દરમિયાન TTD ને સપ્લાય કરાયેલા ઘી સાથે સંબંધિત છે. એજન્સીએ આ સમયગાળા દરમિયાનની કથિત છેતરપિંડીયુક્ત સપ્લાયનું કુલ મૂલ્ય રૂ. 230 કરોડ આંક્યું છે.

તપાસમાં આ ભેળસેળવાળા ઉત્પાદનના મોટા ભાગના નિર્માણમાં મંગલાની કથિત ભૂમિકા પણ સામે આવી છે. એજન્સીએ કહ્યું, "2019-2024 દરમિયાન TTD ને કરાયેલી કથિત છેતરપિંડીયુક્ત ઘી સપ્લાયનું મૂલ્ય રૂ. 230 કરોડ હતું, જેમાંથી રૂ. 96 કરોડનું ભેળસેળવાળું ઘી કૈલાશ ચંદ મંગલા દ્વારા બનાવવામાં આવ્યું હતું.”