સિટી ન્યુઝ @ ભાવનગર

ભાવનગર જિલ્લાની જીવાદોરી સમાન અને સૌરાષ્ટ્રના સૌથી મોટા એવા શેત્રુંજી ડેમ ચાલુ ચોમાસાની સિઝનમાં ચોથી વખત ઓવરફ્લો થઈને છલકાયો છે. મોડી સાંજે ડેમ ઓવરફ્લો થતાં તેના ૨૦ દરવાજા ખોલી નાંખવામાં આવ્યા છે. શેત્રુંજી ડેમ ઉપરાંત આ વિસ્તારના અન્ય ત્રણ ડેમ પણ પાણીથી ઓવરફ્લો થયા છે. ઉપરવાસમાં સારો એવો વરસાદ વરસવાના કારણે શેત્રુંજી ડેમમાં પાણીની ભારે આવક શરૂ થઈ હતી, જેના પગલે સાંજે ૭ કલાકે ડેમ સત્તાવાર રીતે ઓવરફ્લો થયો હતો.

રાત્રિના ૯:૩૦ કલાકની સ્થિતિએ શેત્રુંજી જળાશયમાં ૧૮૦૦ ક્યુસેક પાણીની આવક શરૂ રહેતા, સુરક્ષાના ભાગરૂપે ડેમના ૨૦ દરવાજા એક ફૂટ ખુલ્લા રાખીને તેટલા જ પ્રમાણમાં પાણીનું ડાઉનસ્ટ્રીમમાં છોડવામાં આવી રહ્યું છે. આ ઉપરાંત અન્ય જળાશયોની વાત કરીએ તો, ઉતાવળી ડેમમાં ૬૦૧ ક્યુસેક, પીંગળી ડેમમાં ૫૩ ક્યુસેક અને રોજકી ડેમમાં ૧૮૨ ક્યુસેક પાણીની આવક-જાવક યથાવત છે. આ સાથે બગડ ડેમમાં પણ ૧૯૬ ક્યુસેક પાણીની આવક શરૂ રહી છે. ભાવનગર અને બોટાદ જિલ્લાના સાત ડેમ વિસ્તારોમાં પા ઈંચથી અર્ધો ઈંચ જેટલો વરસાદ વરસ્યો હોવાનું નોંધાયું છે. સિંચાઈ વિભાગના સૂત્રોના જણાવ્યા અનુસાર કાનિયાડ, ગોમા, રજાવળ, ખારો અને માલણ ખાતે ૧૦-૧૦ મિ.મી. તેમજ શેત્રુંજી અને પીંગળી ડેમ વિસ્તારમાં પાંચ-પાંચ મિ.મી. વરસાદ વરસ્યો છે.

જળસંપત્તિ અને સિંચાઈ

ચોમાસાની ઋતુ દરમિયાન જળાશયોમાં પાણીની આવક વધવાથી અને ડેમ છલકાવાથી સિંચાઈ તેમજ પીવાના પાણીની જરૂરિયાતો ઉત્તમ રીતે સંતોષાય છે, પરંતુ નીચાણવાળા વિસ્તારોમાં સુરક્ષા જાળવવી પણ એટલી જ અનિવાર્ય છે.