સિટી ન્યુઝ @ હાંગઝોઉ

વિશાળ દરિયાકિનારો ધરાવતા ચીનમાં દર વર્ષે ઓછામાં ઓછી 4 વખત તીવ્રથી અતિતીવ્ર ગ્રેડના કુદરતી વાવાઝોડા ત્રાટકતા રહે છે, જ્યાં 110 થી 150 કિલોમીટર પ્રતિ કલાકની ઝડપે ફૂંકાતા પવનનો સામનો કરવો સામાન્ય બાબત છે. જોકે આ કુદરતી સંકટ વચ્ચે લોકોને આપત્તિ વ્યવસ્થાપનની તાલીમ અને રોમાંચક અનુભવ આપવા માટે ચીનના હાંગઝોઉ શહેરમાં એક ખાસ અદ્યતન 'ટાઇફૂન સેન્ટર' શરૂ કરવામાં આવ્યું છે.

આ સેન્ટરમાં વિવિધ થીમ આધારિત અલગ-અલગ સેક્શન્સ તૈયાર કરવામાં આવ્યા છે, જેમાં ભયાનક વાવાઝોડું, ભારે પવનનો સૂસવાટો, ધોધમાર વરસાદ, પાણીનો ધસારો અને આસપાસથી વસ્તુઓ તૂટીને પડતી હોય તેવો વાસ્તવિક માહોલ કૃત્રિમ રીતે ઊભો કરવામાં આવે છે. જો કોઈ વ્યક્તિ અંડરગ્રાઉન્ડ પાર્કિંગમાં ફસાઈ ગઈ હોય અને અચાનક પૂરનું પાણી ભરાઈ જાય, તો કેવી વિષમ પરિસ્થિતિ સર્જાય તેનો આબેહૂબ અનુભવ અહીં કરાવવામાં આવે છે.

મુલાકાતીઓને સુરક્ષા માટે હેલ્મેટ અને ખાસ સેફ્ટી ગિયર્સ પહેરાવવામાં આવે છે. આપત્તિ સમયે ગભરાયા વિના કઈ ચીજો પકડીને પોતાનો જીવ બચાવી શકાય તેનું પ્રાથમિક માર્ગદર્શન પણ નિષ્ણાતો દ્વારા આપવામાં આવે છે. ત્યારબાદ સિમ્યુલેશન દ્વારા કૃત્રિમ વાવાઝોડું અને ફ્લેશ ફ્લડ સર્જવામાં આવે છે, જેમાં લોકો આપબળે બચવાનો પ્રયાસ કરે છે.

આ સમગ્ર કવાયત દરમિયાન ઇમરજન્સી હેન્ડલિંગ માટે સેન્ટરની પ્રોફેશનલ રેસ્ક્યુ ટીમ સતત તહેનાત રહે છે. મુલાકાતીઓ આપત્તિની ગંભીરતાનો સંપૂર્ણ અનુભવ કરી લે તે પછી જ રેસ્ક્યુ ટીમ તેમને સુરક્ષિત રીતે બહાર કાઢવાની કામગીરી શરૂ કરે છે. આ અનોખા અનુભવ અને તાલીમ માટે સેન્ટર દ્વારા પ્રતિ વ્યક્તિ આશરે ₹12,000 જેટલી એન્ટ્રી ફી વસૂલવામાં આવે છે.

છેલ્લા 2 વર્ષથી કાર્યરત આ સેન્ટર સામાન્ય નાગરિકોમાં ભારે લોકપ્રિય બન્યું છે અને અત્યાર સુધીમાં 1.6 લાખથી વધુ લોકો તેની મુલાકાત લઈ ચૂક્યા છે. કુદરતી આપત્તિઓ સામે માત્ર સિદ્ધાંતો શીખવાડવાને બદલે આવી પ્રેક્ટિકલ તાલીમથી સામાન્ય જનતામાં આપત્તિ વ્યવસ્થાપન પ્રત્યેની સભાનતા અને આત્મવિશ્વાસ વધારવામાં મદદ મળી રહી છે.

ચીનમાં કૃત્રિમ વાવાઝોડાનો અનુભવ કરાવતું સેન્ટર

ચીનના હાંગઝોઉમાં એક ખાસ ટાઇફૂન સેન્ટર બનાવવામાં આવ્યું છે જ્યાં 110 થી 150 કિમી ઝડપના પવન અને ફ્લેશ ફ્લડ જેવી સ્થિતિ ઊભી કરીને લોકોને આપત્તિમાંથી બચવાની તાલીમ અપાય છે. ₹12,000 ની ફી ધરાવતા આ સેન્ટરની 2 વર્ષમાં 1.6 લાખ લોકો મુલાકાત લઈ ચૂક્યા છે. મુલાકાતીઓને સેફ્ટી ગિયર્સ પહેરાવી રેસ્ક્યુ ટીમની દેખરેખ હેઠળ તાલીમ અપાય છે.