• સુરતમાં અન્નપૂર્ણા ખોડલધામના નિર્માણની સત્તાવાર જાહેરાત કરાઈ.

• મોટા વરાછાના ગરબા મહોત્સવમાં થઈ મોટી ઘોષણા.

• મુકેશ પટેલ અને જયંતિ એકલારા મુખ્ય સ્વપ્નદ્રષ્ટા.

સિટી ન્યુઝ @ સુરત

સુરત શહેરમાં બીજા ખોડલધામના નિર્માણને લઈને લાંબા સમયથી ચાલી રહેલી અટકળો અને ચર્ચાઓ પર હવે આખરે પૂર્ણવિરામ મુકાઈ ગયું છે. સુરતના મોટા વરાછા વિસ્તારમાં આયોજિત પ્રખ્યાત 'શેરી ઓટલો નવરાત્રી મહોત્સવ'ના ભવ્ય મંચ પરથી સુરતમાં બનનારા નવા ખોડલધામ અંગે સત્તાવાર જાહેરાત કરવામાં આવી છે.

સુરતમાં બનનારું આ નવું ખોડલધામ ‘અન્નપૂર્ણા ખોડલધામ’ તરીકે ઓળખાશે અને તે જ નામથી તેનું નિર્માણ કાર્ય આગળ વધારવામાં આવશે. નવરાત્રિ પર્વના પાવન અવસરે ભક્તિભાવના વાતાવરણમાં આ ભવ્ય પ્રોજેક્ટની ઝાંખી પણ રજૂ કરવામાં આવી હતી, જેને નિહાળીને કાર્યક્રમમાં ઉપસ્થિત સૌ લોકોમાં અનેરો ઉત્સાહ જોવા મળ્યો હતો.

આ ભગીરથ કાર્ય પાછળ રહેલા મુખ્ય સ્વપ્નદ્રષ્ટાઓ તરીકે પાટીદાર સમાજના જાણીતા અગ્રણી મુકેશ પટેલ અને જયંતિ એકલારાના નામ સત્તાવાર રીતે જાહેર કરવામાં આવ્યા છે. આ બંને અગ્રણીઓની સક્રિય આગેવાની હેઠળ સમગ્ર મંદિર નિર્માણની પ્રક્રિયા પૂર્ણ કરવામાં આવશે. આ ઐતિહાસિક ઘોષણા બાદ સુરતના પાટીદાર સમાજમાં એકતા, દિવ્યતા અને ભારે ઉત્સાહનો માહોલ જોવા મળી રહ્યો છે.

• અટકળોનો અંત, સુરતમાં ખોડલધામ નિર્માણની જાહેરાત થઈ! 

  સુરતના મોટા વરાછા ખાતે નવરાત્રી મહોત્સવના મંચ પરથી સુરતમાં બીજા ખોડલધામના નિર્માણની સત્તાવાર જાહેરાત કરવામાં આવી છે. આ નવું સંકુલ 'અન્નપૂર્ણા ખોડલધામ' તરીકે ઓળખાશે, જેના મુખ્ય સ્વપ્નદ્રષ્ટા તરીકે અગ્રણી મુકેશ પટેલ અને જયંતિ એકલારા જવાબદારી સંભાળશે. આ જાહેરાતથી પાટીદાર સમાજમાં ભારે ખુશી અને ઉત્સાહ જોવા મળી રહ્યો છે.