સિટી ન્યુઝ @ ન્યૂયોર્ક

ઘરના મુખ્ય રૂમ કે લિવિંગ એરિયા બાદ હવે આધુનિક ટેકનોલોજીએ બાથરૂમમાં પણ એન્ટ્રી કરી લીધી છે. અત્યાર સુધી માત્ર લક્ઝરી હોટેલો કે એશિયાઈ દેશો પૂરતાં મર્યાદિત ગણાતાં 'સ્માર્ટ ટોઇલેટ' વર્ષ 2026 માં વિશ્વભરનાં ઘરોમાં એક મોટો વૈશ્વિક ટ્રેન્ડ બનીને ઉભરી રહ્યાં છે. વધુ સારી સ્વચ્છતા, અદ્યતન સુવિધા અને પર્યાવરણની સુરક્ષાને કારણે લોકો હવે પરંપરાગત પદ્ધતિઓ છોડીને આ નવી અને અત્યાધુનિક ટેકનોલોજી તરફ ઝડપથી વળી રહ્યાં છે.

મૂળ જાપાનથી શરૂ થયેલી આ 'વોશલેટ્સ' ટેકનોલોજી હવે આંતરરાષ્ટ્રીય સ્તરે ધૂમ મચાવી રહી છે. આ એવા ખાસ પ્રકારના ડિવાઇસ છે જે ટોઇલેટ અને બિડેટ એટલે કે પાણીથી સાફ કરવાની પ્રણાલી બંનેનાં કાર્યોને એક જ યુનિટમાં જોડે છે. આમાં યુઝર્સ પોતાની જરૂરિયાત મુજબ પાણીનું તાપમાન, પ્રેશર અને દિશા સેટ કરી શકે છે. આ ઉપરાંત વ્યક્તિની હાજરી ઓળખીને સીટ આપોઆપ ઓપરેટ થાય છે તેમજ આમાં ગરમ હવાથી ડ્રાય કરવાની સિસ્ટમ અને ગરમ સીટ જેવી અદભુત સુવિધાઓ પણ ઉપલબ્ધ હોય છે.

આ સ્માર્ટ ટોઇલેટના કારણે ભવિષ્યમાં ટોઇલેટ પેપરનો ઉપયોગ સંપૂર્ણપણે બંધ થઈ શકે છે. નિષ્ણાતોના મતે, કાગળનાં ઉપયોગ કરતાં પાણીથી થતી સફાઈ વધુ બેક્ટેરિયા રહિત હોય છે અને ત્વચા માટે નરમ સાબિત થાય છે. આ ટેકનોલોજી ડાયરેક્ટ હાથનાં સંપર્કને ઘટાડે છે અને ઘણા મોડલ્સમાં પોતાની જાતે સાફ થતાં એન્ટી-બેક્ટેરિયલ પ્રોગ્રામ્સ પણ સામેલ હોય છે. કાગળનો વપરાશ ઘટવાથી વૃક્ષોનો બચાવ થશે, જેથી આર્કિટેક્ટ્સ હવે આધુનિક ઘરનાં પ્રોજેક્ટ્સમાં આ સ્માર્ટ ટોઇલેટને સ્ટાન્ડર્ડ તરીકે સામેલ કરી રહ્યાં છે.

નિયમિત સફાઈ અને જાળવણી અત્યંત જરૂરી ઓટોમેટિક અને એન્ટી-બેક્ટેરિયલ સિસ્ટમ હોવા છતાં આ સ્માર્ટ ઉપકરણોને યોગ્ય જાળવણીની આવશ્યકતા રહે છે. દુર્ગંધ અને હાનિકારક બેક્ટેરિયાથી કાયમી છુટકારો મેળવવા માટે સેન્સર અને નોઝલ જેવા ભાગોની નિયમિત મેન્યુઅલ સફાઈ અનિવાર્ય છે. યોગ્ય કાળજી લેવામાં આવે તો આ નવીન ટેકનોલોજી આગામી સમયમાં માનવીની રોજિંદી હાઇજીનની આદતોને કાયમ માટે બદલીને વધુ સુરક્ષિત અને આરામદાયક બનાવી દેશે.