• ખેડૂત દેવા માફી યોજનામાં ફેરફારને આવકારી પવારનો મુખ્યમંત્રી પ્રત્યે આભાર
• સરકારના નિર્ણયની પ્રશંસા બાદ રાજકીય વર્તુળોમાં તર્ક-વિતર્કનો દૌર
• શરદ પવાર અને ડેપ્યુટી CM ની મુલાકાત બાદ રાજકીય ગરમાવો

સિટી ન્યુઝ @ મુંબઈ

મહારાષ્ટ્રના રાજકારણમાં ગરમાવો જોવા મળી રહ્યો છે, જેમાં NCP (SCP) ના વડા શરદ પવારે રાજ્ય સરકારની ખેડૂત દેવા માફી યોજનામાં કરેલા ફેરફારોની ખુલીને પ્રશંસા કરી છે. ૮ જુલાઈના રોજ વિધાનભવન ખાતે સીમા વિવાદ અંગેની મીટિંગ બાદ પવારે ડેપ્યુટી CM શિંદે સાથે મુલાકાત કરી હતી, ત્યારબાદ આ અટકળોએ વધુ વેગ પકડ્યો છે. પવારે જણાવ્યું હતું કે, ખેડૂત દેવા માફી યોજનામાં અગાઉની જોગવાઈઓ લાખો ખેડૂતોને યોજનાથી વંચિત રાખતી હતી, પરંતુ હવે તેમાં સુધારો થવાથી ખેડૂતોને મોટો ફાયદો થશે. તેમણે આ માટે મુખ્યમંત્રી અને સરકારનો આભાર માન્યો હતો.

આ ઘટના બાદ NCP નું NDA માં જોડાણ અથવા કોંગ્રેસમાં વિલય થવાની અટકળોએ જોર પકડ્યું છે. જોકે, NCP ના પ્રદેશ અધ્યક્ષ શશિકાંત શિંદેએ આ તમામ ચર્ચાઓને ફગાવી દેતા તેને માત્ર અફવા ગણાવી છે. સૂત્રોના જણાવ્યા અનુસાર, પવારની પાર્ટીના મોટાભાગના નેતાઓ NDA માં સામેલ થવાના પક્ષમાં નથી અને આ મુદ્દે પાર્ટીમાં આંતરિક અસંમતિ પણ જોવા મળી રહી છે. રાજકીય વિશ્લેષકોના મતે, પવારનું આ વલણ માત્ર ખેડૂતોના હિત માટે છે, પરંતુ તેમની અને સરકારના ટોચના નેતાઓ વચ્ચેની વધતી મુલાકાતો અનેક સવાલો પણ ઉભા કરી રહી છે.

શરદ પવાર દ્વારા વખાણવામાં આવેલી યોજનામાં અગાઉ ૫૦ હજાર રૂપિયા સુધીની જ રાહતની જોગવાઈ હતી અને નિયમિત લોન ભરતા ખેડૂતો માટે પણ કડક શરતો હતી. પવારના મતે, આ શરતો પાછી ખેંચવી એ ખેડૂતોની ભાવનાઓને માન આપવા સમાન છે. ૧૯૯૯માં કોંગ્રેસથી અલગ થઈને NCP ની સ્થાપના કરનાર શરદ પવાર હંમેશા મહારાષ્ટ્રના રાજકારણમાં એક ચાવીરૂપ નેતા રહ્યા છે. હવે જોવાનું એ રહ્યું કે આ નવી ઘટનાક્રમ ભવિષ્યના રાજકીય સમીકરણોમાં કેવા બદલાવ લાવે છે.

દેવા માફી યોજના

સરકાર દ્વારા ખેડૂતોની દેવા માફી યોજનામાં કરવામાં આવેલા ફેરફારોને શરદ પવારે આવકાર્યા છે. અગાઉની યોજનામાં ૫૦ હજાર રૂપિયા સુધીની મર્યાદા અને પાક ધિરાણની ફરજિયાત ચુકવણી જેવી શરતોને કારણે લાખો ખેડૂતો લાભાન્વિત થતા ન હતા. પવારના મતે આ શરતો હટાવવાથી ખેડૂતોને સાચી રાહત મળી છે. સરકારે લીધેલા આ નિર્ણયથી રાજ્યના કૃષિ ક્ષેત્રમાં સકારાત્મક અસર પડવાની અપેક્ષા છે, જેની પવારે ખુલ્લેઆમ સરાહના કરી છે.