વડાપ્રધાને દેશવાસીઓને વિનંતી કરી છે કે તેઓ આગામી એક વર્ષ સુધી સોના અને ચાંદીની ખરીદી કરવાનું ટાળે. લગ્ન કે અન્ય પ્રસંગોએ પણ સોનામાં રોકાણ ઘટાડવા તેમણે ભાર મૂક્યો હતો. પીએમ મોદીએ કોરોના કાળની યાદ અપાવતા કહ્યું કે, "આપણે જે રીતે વર્ક ફ્રોમ હોમ, ઓનલાઈન મીટિંગ્સ અને વીડિયો કોન્ફરન્સની આદત પાડી હતી, તેને ફરીથી અપનાવવાનો સમય આવી ગયો છે." બિનજરૂરી અવરજવર ઘટાડીને ઈંધણ બચાવવા માટે તેમણે ખાનગી વાહનોના બદલે મેટ્રો અને જાહેર પરિવહનનો ઉપયોગ વધારવા તેમજ કાર પુલિંગ અને ઈલેક્ટ્રિક વાહનો અપનાવવા આહવાન કર્યું છે.

વૈશ્વિક યુદ્ધોના કારણે ફર્ટિલાઈઝર અને તેલના ભાવમાં થયેલા વધારાનો ઉલ્લેખ કરતા પીએમએ લોકોને ખાદ્ય તેલનો વપરાશ ઘટાડવા અને વિદેશી પ્રવાસના બદલે સ્થાનિક પ્રવાસનને પ્રોત્સાહન આપવા જણાવ્યું હતું. તેમણે ઉમેર્યું કે ભારત પાસે ઓઈલના વિશાળ ભંડાર નથી, તેથી પેટ્રોલ-ડીઝલના વપરાશમાં કરકસર કરવી અનિવાર્ય છે. સપ્લાય ચેઈનમાં અવરોધો અને મોંઘવારીની અસરો સામે લડવા માટે દેશવાસીઓએ સંયુક્ત પ્રયાસો કરવા પડશે.

વડાપ્રધાનની આ અપીલને નિષ્ણાતો ભારતની 'આર્થિક સુરક્ષા' માટેની પૂર્વતૈયારી તરીકે જોઈ રહ્યા છે. વૈશ્વિક અસ્થિરતા વચ્ચે જો જનતા આ આર્થિક અનુશાસનનું પાલન કરે, તો જ દેશનું વિદેશી હુંડિયામણ અને અર્થતંત્ર સુરક્ષિત રહી શકશે. વડાપ્રધાને વિશ્વાસ વ્યક્ત કર્યો કે જે રીતે ભારતે કોરોના સામે લડત આપી હતી, તે જ રીતે આર્થિક કટોકટી સામે પણ જનતાની ભાગીદારીથી વિજય મેળવશે.