સિટી ન્યુઝ @ તિરુવનંતપુરમ 

કેન્દ્રશાસિત પ્રદેશ પુડુચેરીમાં એન. રંગાસામીએ પાંચમી વખત મુખ્યમંત્રી તરીકે પદભાર સંભાળ્યો છે. લોક ભવન ખાતે આયોજિત ભવ્ય શપથવિધિ સમારોહમાં ઉપ-રાજ્યપાલ કૈલાશ નાથને તેમને હોદ્દા અને ગુપ્તતાના શપથ લેવડાવ્યા હતા. આ પ્રસંગે ભાજપના રાષ્ટ્રીય અધ્યક્ષ નિતિન નવીન ખાસ ઉપસ્થિત રહ્યા હતા, જે દક્ષિણ ભારતમાં ભાજપ અને તેના સહયોગી પક્ષોની મજબૂત પકડ દર્શાવે છે. 4 મેના રોજ જાહેર થયેલા પરિણામોમાં રંગાસામીના નેતૃત્વવાળા NDA ગઠબંધને 30 માંથી 16 બેઠકો મેળવી બહુમતી હાંસલ કરી હતી.

ચૂંટણીના આંકડાકીય વિશ્લેષણ મુજબ, પુડુચેરીમાં AINRC નો દેખાવ અત્યંત પ્રભાવશાળી રહ્યો છે. પક્ષે 16 બેઠકો પર ચૂંટણી લડીને 12 બેઠકો જીતી છે, જે 75% નો સૌથી ઊંચો સ્ટ્રાઈક રેટ સૂચવે છે. જ્યારે ભાજપે 10 માંથી 4 બેઠકો જીતીને બીજું સ્થાન મેળવ્યું છે. તેની સામે કોંગ્રેસ માટે આ પરિણામો આંચકાજનક રહ્યા છે, કારણ કે પક્ષ 16 બેઠકો પર લડવા છતાં માત્ર 1 બેઠક જીતી શક્યો છે. આમ, પુડુચેરીમાં હવે નવી સરકારના ગઠન સાથે જ વિકાસકાર્યોને વેગ મળવાની આશા સેવાઈ રહી છે.

બીજી તરફ, પડોશી રાજ્ય કેરળમાં ચૂંટણી પરિણામોના 9 દિવસ વીતી ગયા હોવા છતાં મુખ્યમંત્રીના નામ પર હજુ પણ સસ્પેન્સ યથાવત છે. જોકે, પૂર્વ પ્રદેશ કોંગ્રેસ અધ્યક્ષ કે. મુરલીધરને રાહુલ ગાંધી સાથેની મુલાકાત બાદ એવો દાવો કર્યો છે કે બુધવારે સવાર સુધીમાં મુખ્યમંત્રીના નામની સત્તાવાર જાહેરાત થઈ જશે. બંગાળ, આસામ અને તમિલનાડુમાં શપથવિધિ પૂર્ણ થઈ ચૂકી છે, ત્યારે હવે સૌની નજર કેરળમાં કોંગ્રેસ હાઈકમાન્ડના અંતિમ નિર્ણય પર ટકેલી છે.

કેરળમાં મુખ્યમંત્રી પદ માટે બે મુખ્ય નામો ચર્ચામાં છે. સૂત્રોના જણાવ્યા અનુસાર, રાહુલ ગાંધીની પહેલી પસંદ કેસી વેણુગોપાલ છે, જેમની સાથે તેમણે દિલ્હીમાં લાંબી બેઠક કરી હતી. ધારાસભ્ય દળની બેઠકમાં પણ અંદાજે 75-80% સભ્યોએ વેણુગોપાલને સમર્થન આપ્યું હોવાનું જાણવા મળ્યું છે. જોકે, વીડી સતીશન પણ મજબૂત દાવેદાર માનવામાં આવે છે, જેમને UDF ના સહયોગી પક્ષો જેવા કે IUML અને કેરળ કોંગ્રેસ (જોસેફ) નું સમર્થન પ્રાપ્ત છે.

કોંગ્રેસ હાઈકમાન્ડે આ મડાગાંઠ ઉકેલવા માટે કેરળના વરિષ્ઠ નેતાઓ અને પૂર્વ પ્રદેશ અધ્યક્ષોને દિલ્હી તેડાવ્યા છે. સોશિયલ મીડિયા પર પણ વેણુગોપાલના સમર્થનમાં વિવિધ નેતાઓના ફોટા વાયરલ થઈ રહ્યા છે. કેરળમાં નવી સરકારના શપથવિધિમાં થઈ રહેલો વિલંબ રાજકીય ગલિયારાઓમાં ચર્ચાનો વિષય બન્યો છે. હવે જોવાનું એ રહે છે કે, હાઈકમાન્ડ વેણુગોપાલ પર પસંદગી ઉતારે છે કે ગઠબંધનના સાથી પક્ષોની ઈચ્છા મુજબ સતીશનને તક આપે છે.