સિટી ન્યુઝ @

અમદાવાદના નરેન્દ્ર મોદી સ્ટેડિયમ ખાતે રમાયેલી IPL 2026 ની મહત્વની મેચમાં ગુજરાત ટાઇટન્સે સનરાઇઝર્સ હૈદરાબાદને 82 રને હરાવીને પોઈન્ટ ટેબલમાં પ્રથમ સ્થાન હાંસલ કરી લીધું છે. ગુજરાતની આ જીત IPL ઇતિહાસમાં રનની દ્રષ્ટિએ અત્યાર સુધીની સૌથી મોટી જીત સાબિત થઈ છે. 168 રનના લક્ષ્યાંકનો પીછો કરવા ઉતરેલી હૈદરાબાદની ટીમ ગુજરાતના બોલરો સામે લાચાર દેખાઈ હતી અને તેનો કારમો પરાજય થયો હતો.

મેચની વિગતો મુજબ, ગુજરાત ટાઇટન્સે પ્રથમ બેટિંગ કરતા 5 વિકેટ પર 168 રન બનાવ્યા હતા. જોકે, ગુજરાતની શરૂઆત નબળી રહી હતી અને કેપ્ટન શુભમન ગિલ માત્ર 5 રન બનાવી પેવેલિયન ભેગો થયો હતો. ત્યારબાદ સાઈ સુદર્શન (61 રન) અને વોશિંગ્ટન સુંદર (50 રન) ની શાનદાર અડધી સદીઓની મદદથી ગુજરાતે સન્માનજનક સ્કોર ખડો કર્યો હતો. સુદર્શને પોતાની ઇનિંગમાં 5 ચોગ્ગા અને 2 છગ્ગા ફટકાર્યા હતા, જ્યારે સુંદરે 33 બોલમાં ઝડપી 50 રન બનાવ્યા હતા.

169 રનના રનચેઝમાં સનરાઇઝર્સ હૈદરાબાદની શરૂઆત અત્યંત નિરાશાજનક રહી હતી. પાવરપ્લેમાં જ ટીમે મહત્વની 4 વિકેટો ગુમાવી દીધી હતી. મોહમ્મદ સિરાજે ટ્રેવિસ હેડને ખાતું ખોલવાની તક આપી નહોતી. ત્યારબાદ કગિસો રબાડાએ અભિષેક શર્મા અને ઇશાન કિશન જેવી મોટી વિકેટો ઝડપીને હૈદરાબાદની મુશ્કેલીમાં વધારો કર્યો હતો. હૈદરાબાદનો સ્કોર એક સમયે 32 રને 4 વિકેટ થઈ ગયો હતો, જેમાંથી ટીમ ક્યારેય બહાર આવી શકી નહીં.

ગુજરાત તરફથી જેસન હોલ્ડર અને કગિસો રબાડાએ ઘાતક બોલિંગનું પ્રદર્શન કરતા 3-3 વિકેટો ઝડપી હતી. હોલ્ડરે એક જ ઓવરમાં હેનરિક ક્લાસેન અને નીતીશ કુમાર રેડ્ડીને આઉટ કરીને હૈદરાબાદની હાર નિશ્ચિત કરી દીધી હતી. પ્રસિદ્ધ કૃષ્ણાને પણ બે સફળતા મળી હતી. હૈદરાબાદની ટીમ પત્તાના મહેલની જેમ વિખેરાઈ ગઈ હતી અને શિવાંગ કુમાર તેમજ પેટ કમિન્સ જેવા ખેલાડીઓ પણ સ્કોર કરવામાં નિષ્ફળ રહ્યા હતા.

આ જીત સાથે ગુજરાત ટાઇટન્સ હવે 12 મેચમાંથી 8 જીત અને 16 પોઈન્ટ સાથે ટેબલ ટોપર બની ગઈ છે. બીજી તરફ, હૈદરાબાદની ટીમ આ શરમજનક હાર બાદ 14 પોઈન્ટ સાથે ત્રીજા સ્થાને ધકેલાઈ છે. ગુજરાતની ટીમે આ સિઝનમાં સતત પાંચમી જીત નોંધાવીને પ્લે-ઓફ માટે પોતાની મજબૂત દાવેદારી પેશ કરી છે. અમદાવાદના ગ્રાઉન્ડ પર હોમ ટીમનો આ દબદબો જોઈને સ્ટેડિયમમાં હાજર હજારો પ્રશંસકોમાં ખુશીનો માહોલ છવાઈ ગયો હતો.