સિટી ન્યુઝ @ જૂનાગઢ

જૂનાગઢ જિલ્લાના વિસાવદર તાલુકાના ગ્રામ્ય પંથકમાં બેફામ દોડતા ભારે વાહનોએ વધુ એક માસૂમ અને નિર્દોષ યુવકનો ભોગ લીધો છે. પિયાવા ગામ નજીક ગઈકાલે મોડી રાત્રે બનેલી એક ગમખ્વાર અકસ્માતની ઘટનામાં 22 વર્ષીય યુવક રવિ ભોજવિયાનું કરુણ મોત નીપજ્યું છે. આશાસ્પદ યુવકના અકાળે અવસાનથી સમગ્ર ભોજવિયા પરિવાર ઊંડા શોકમાં ગરકાવ થઈ ગયો છે અને સ્થાનિક લોકોમાં ભારે રોષ જોવા મળી રહ્યો છે.

ઘટનાની વિગતો મુજબ, મૃતક રવિ ભોજવિયા પિયાવા ગામનો રહેવાસી હતો અને ગામ પાસેના હાઈવે પર ચાની હોટેલ ચલાવીને પોતાના પરિવારને આર્થિક રીતે મદદરૂપ થતો હતો. દરરોજની જેમ ગઈકાલે રાત્રે પણ હોટેલનું કામકાજ પૂર્ણ કરી તે પોતાના મોટરસાયકલ પર સવાર થઈ ઘરે પરત ફરી રહ્યો હતો. આ દરમિયાન પૂરપાટ ઝડપે અને ગફલતભરી રીતે આવી રહેલા એક દૂધના ટેન્કરના ચાલકે રવિના બાઇકને જોરદાર ટક્કર મારી હતી.

અકસ્માત એટલો ભયાનક હતો કે રવિ લોહીલુહાણ હાલતમાં રસ્તા પર ફંગોળાયો હતો. અકસ્માત જોઈને નજીકના અન્ય હોટેલ સંચાલકો દોડી આવ્યા હતા અને તુરંત રવિના ભાઈ સંજયને જાણ કરી હતી. સંજય ભોજવિયાએ જણાવ્યું કે, જ્યારે તેઓ અને તેમના પિતા હરસુખભાઈ ઘટનાસ્થળે પહોંચ્યા ત્યારે રવિ ગંભીર હાલતમાં રસ્તા પર પડ્યો હતો અને ટેન્કર પર લોહીના ડાઘા સ્પષ્ટ દેખાઈ રહ્યા હતા. ગંભીર રીતે ઇજાગ્રસ્ત રવિને 108 મારફતે હોસ્પિટલ ખસેડાયો હતો, પરંતુ સારવાર કારગત નીવડી નહોતી.

જુવાનજોધ દીકરો ગુમાવનારા પિતા હરસુખભાઈનું હોસ્પિટલમાં આક્રંદ જોઈને ત્યાં હાજર સૌ કોઈની આંખો ભીની થઈ ગઈ હતી. તેમણે ભારે આક્રોશ સાથે જણાવ્યું કે, તેમનો પુત્ર મહેનત મજૂરી કરીને ઘર તરફ આવી રહ્યો હતો, છતાં બેદરકાર ચાલકની ભૂલને કારણે તેનો જીવ ગયો છે. પરિવારનો મુખ્ય આર્થિક આધાર ગણાતા રવિના મોતે પરિવારની કમર તોડી નાખી છે.

હાલમાં વિસાવદર પોલીસે આ મામલે અકસ્માતે મોતનો ગુનો નોંધીને ટેન્કર ચાલક વિરુદ્ધ કાયદેસરની કાર્યવાહી હાથ ધરી છે. ભોજવિયા પરિવારે તંત્ર પાસે ન્યાયની માંગ કરી છે કે આવા બેફામ વાહનો ચલાવતા ચાલકો સામે કડક પગલાં લેવામાં આવે જેથી ભવિષ્યમાં કોઈ અન્ય પરિવારનો ચિરાગ ન બુઝાય. પોલીસે પંચનામું કરી તપાસના ચક્રો ગતિમાન કર્યા છે.