ગુજરાત વિધાનસભાના ચાલુ સત્રમાં અશાંતધારા (Disturbed Areas Act) સુધારા વિધેયક-2026 પર ચર્ચા દરમિયાન ભારે હંગામો જોવા મળ્યો હતો. ભાજપના ધારાસભ્ય અમિત ઠાકરે AMCના અહેવાલને ટાંકીને કરેલા એક નિવેદને રાજકીય વાતાવરણ ગરમ કરી દીધું હતું. તેમણે જણાવ્યું હતું કે અમદાવાદના જુહાપુરામાં એટલું દબાણ છે જે રાજકોટના '5 જંગલેશ્વર' વિસ્તાર સમાન છે. આ દરમિયાન ભાજપના કૌશિક જૈન અને કોંગ્રેસના ઈમરાન ખેડાવાલા વચ્ચે "કાયદામાં રહેશો તો ફાયદામાં રહેશો" જેવી ટિપ્પણીઓ બાદ તીખી બોલાચાલી થઈ હતી.

કલેક્ટરને મળી સીધી સત્તા મહેસૂલ મંત્રી સંજયસિંહ મહિડાએ રજૂ કરેલા સુધારા વિધેયક મુજબ, હવેથી અશાંત વિસ્તાર 'નિર્દિષ્ટ વિસ્તાર' તરીકે ઓળખાશે. આ કાયદામાં સૌથી મહત્વનો સુધારો એ છે કે હવે કલેક્ટર કોઈપણ ફરિયાદ વગર પોતાની મેળે 'સુઓ મોટો' કાર્યવાહી કરી શકશે. જો મિલકતની તબદીલીમાં નિયમોનું ઉલ્લંઘન જણાશે, તો કલેક્ટર તે મિલકતનો કબજો પણ લઈ શકશે. આ સુધારાનો મુખ્ય ઉદ્દેશ્ય મિલકતોનું અનૈચ્છિક સ્થળાંતર રોકવાનો અને કાયદેસરના માલિકોના હિતોનું રક્ષણ કરવાનો છે.

અધ્યક્ષે મંત્રીઓ અને અધિકારીઓને ખખડાવ્યા ગૃહમાં ચર્ચા દરમિયાન જ્યારે મંત્રીઓ પ્રશ્નોના અધૂરા અને અસ્પષ્ટ જવાબો આપી રહ્યા હતા, ત્યારે અધ્યક્ષ શંકર ચૌધરીએ કડક વલણ અપનાવ્યું હતું. તેમણે મંત્રીઓને સ્પષ્ટ સૂચના આપી કે પ્રશ્ન સમજીને ચોક્કસ જવાબ આપે. આટલું જ નહીં, તેમણે ગેલેરીમાં બેઠેલા અધિકારીઓને પણ ટકોર કરી કે તેઓ અહીં માત્ર 'મૂક પ્રેક્ષક' બનીને બેસવા માટે નથી, મંત્રીઓને યોગ્ય બ્રીફિંગ આપવી તેમની જવાબદારી છે. આ ગંભીર વાતાવરણ વચ્ચે અધ્યક્ષે ધારાસભ્ય કેશુભાઈ પટેલને 'કેશુબાપા' સંબોધતા ગૃહમાં હાસ્યનું મોજું ફરી વળ્યું હતું.

રાજ્યમાં ક્રાઈમ અને ડ્રગ્સના ચોંકાવનારા આંકડા પ્રશ્નકાળ દરમિયાન રાજ્યમાં કાયદો અને વ્યવસ્થાની સ્થિતિ પર પણ સવાલો ઉઠ્યા હતા. વર્ષ 2024-25 દરમિયાન રાજ્યમાં કુલ 93 કેદીઓના કસ્ટડીમાં મોત થયા હોવાનું સામે આવ્યું છે. સાયબર ક્રાઈમ ક્ષેત્રે અમદાવાદ અને સુરતમાં છેલ્લા બે વર્ષમાં 201 કરોડથી વધુની ઠગાઈ થઈ છે. દારૂબંધી હોવા છતાં છેલ્લા એક વર્ષમાં અંદાજે 600 કરોડથી વધુની કિંમતનો દારૂ અને નશીલા પદાર્થો જપ્ત કરવામાં આવ્યા છે, જે રાજ્યમાં સુરક્ષા અને કાયદાની અમલવારી પર ગંભીર પ્રશ્નાર્થો ઊભા કરે છે.

હથિયાર લાયસન્સ પર આપ (AAP) નો પ્રહાર આમ આદમી પાર્ટીના ધારાસભ્ય ગોપાલ ઇટાલિયાએ હથિયાર લાયસન્સના આંકડા રજૂ કરતા જણાવ્યું કે અમદાવાદ અને સુરતમાં હજારો લોકો પાસે હથિયાર લાયસન્સ છે અથવા તેની અરજીઓ છે. તેમણે કટાક્ષ કર્યો કે આ આંકડા દર્શાવે છે કે જનતાનો પોલીસ પરથી વિશ્વાસ ઘટી રહ્યો છે અને લોકો સ્વરક્ષણ માટે હથિયાર તરફ વળી રહ્યા છે. બીજી તરફ, ઇમરાન ખેડાવાલાએ સવાલ કર્યો કે જો રાજ્યમાં 30 વર્ષથી શાંતિ હોય, તો પછી અડધા અમદાવાદને હજુ પણ 'ડિસ્ટર્બ' જાહેર કેમ રાખવામાં આવ્યું છે?