સિટી ન્યુઝ @ નવી દિલ્હી 

પશ્ચિમ એશિયામાં યુદ્ધનો દાવાનળ હવે સંપૂર્ણપણે કાબૂ બહાર જઈ ચૂક્યો છે. એપ્રિલ મહિનાના યુદ્ધવિરામ બાદ તેહરાનથી થયેલા સીધા મિસાઈલ હુમલાના જવાબમાં ઈઝરાયલે ઈરાન પર અત્યંત શક્તિશાળી અને આકરો વળતો પ્રહાર કરી દીધો છે. ઈઝરાયલના આ ભયાનક સૈન્ય એક્શનથી સળગી ઉઠેલા ઈરાને હવે આખી દુનિયાને હચમચાવી દેનારી આંતરરાષ્ટ્રીય ધમકી ઉચ્ચારી છે. ઈરાનની આ ધમકીના કારણે વૈશ્વિક વેપાર અને તેલ પુરવઠો સંપૂર્ણપણે ખોરવાઈ જવાનો મોટો ખતરો પેદા થયો છે, જેનાથી આખી દુનિયાના શ્વાસ સરેઆમ અધ્ધર થઈ ગયા છે.

આંતરરાષ્ટ્રીય મીડિયા રિપોર્ટ્સ મુજબ, ઈરાનના વરિષ્ઠ નેતા અલી વિલાયતીએ અત્યંત કડક અને આક્રમક વલણ અપનાવતા ઈઝરાયલને ખુલ્લી ચેતવણી આપી છે. તેમણે સ્પષ્ટ સંદેશ આપતા કહ્યું છે કે દુશ્મને કોઈ પણ પ્રકારની ગેરસમજમાં રહેવાની જરૂર નથી. ઈઝરાયલ પાસે હવે માત્ર 2 જ રસ્તા બચ્યા છે; કાં તો તે પોતાની આ બેવકૂફી તાત્કાલિક બંધ કરે અથવા તો એવા ગંભીર પરિણામોનો સામનો કરવા તૈયાર રહે જ્યાં વિશ્વના 2 સૌથી મહત્વપૂર્ણ દરિયાઈ માર્ગો પર તેને સણસણતો અને વિનાશક જવાબ મળી શકે. આ સીધી ધમકી બાદ તણાવ ચરમસીમાએ પહોંચ્યો છે.

સૈન્ય નિષ્ણાતોના મતે, ઈરાન હવે યમનમાં સક્રિય પોતાના સમર્થિત 'હૂતી' લડવૈયાઓનો ઉપયોગ કરીને યુરોપ અને એશિયાના વ્યાપારની કરોડરજ્જુ સમાન 'બાબ-અલ-મંદેબ' જળમાર્ગને નિશાન બનાવવાની ભયાનક ચાલ રમી રહ્યું છે. જો આ દરિયાઈ માર્ગ પર જહાજોની અવરજવર રોકવામાં આવે, તો ક્રૂડ ઓઈલની સપ્લાય ચેઈન સરેઆમ તૂટી પડશે અને ભારત સહિત દુનિયાભરમાં પેટ્રોલ-ડીઝલના ભાવ આસમાને પહોંચી જશે. દુનિયાભરમાં મોંઘવારીનો નવો વિસ્ફોટ થવાની દહેશત વચ્ચે હવે સૌની નજર સુપરપાવર અમેરિકા અને ડોનાલ્ડ ટ્રમ્પના આગામી આકરા એક્શન પર ટકેલી છે.

દરિયાઈ વેપાર પર સંકટથી મોંઘવારીનો ભયાનક વિસ્ફોટ થશે

બાબ-અલ-મંદેબ જળમાર્ગ બંધ કરવાની ઈરાનની ધમકી માત્ર ઈઝરાયલ માટે જ નહીં, પરંતુ આખી દુનિયાની અર્થવ્યવસ્થા માટે અત્યંત વિનાશક સાબિત થઈ શકે છે. હૂતી લડવૈયાઓ દ્વારા જો વેપારી જહાજો અને ક્રૂડ ઓઇલના ટેન્કરો પર હુમલા તેજ થશે તો દુનિયાભરમાં ઈંધણની ભયાનક અછત સર્જાશે. આંતરરાષ્ટ્રીય બજારમાં ક્રૂડના ભાવ ભડકે બળતા જ ભારત સહિતના તમામ દેશોમાં મોંઘવારીનો અજગર લોકોને ભરખી જશે.