■ ભાવનગરની વિવાદાસ્પદ મહિલા પોલીસ કર્મી નયના બારૈયાના સપોર્ટમાં આવી કીર્તિ પટેલ

■ રાજુ ભંભર અને નયના બારૈયાના સંબંધો તૂટતા કીર્તિ અને રાજુ ભંભર વચ્ચે જંગ શરૂ થયો 

• કીર્તિ પટેલ વિરૂદ્ધ પોલીસમાં ખંડણીખોર છે તેવી અરજી કરતા મામલો બિચક્યો

સિટી ન્યૂઝ@રાજકોટ

સોશિયલ મીડિયા પર પોતાના બેફામ નિવેદનો અને વિવાદોને કારણે હંમેશા ચર્ચામાં રહેતી કીર્તિ પટેલનો એક નવો વીડિયો હાલ સોશિયલ મીડિયામાં વાયુવેગે વાયરલ થઈ રહ્યો છે. આ વાયરલ વીડિયોમાં તે જાતે જ પોતાની જાતને "ગુજરાતની સૌથી મોટી ખંડણીખોર" ગણાવી રહી છે, જેને લઈને રાજ્યભરમાં ભારે આશ્ચર્ય અને ટીકાઓનો દોર શરૂ થયો છે.

સામાન્ય રીતે લોકો પોતાની છબી સુધારવા માટે સોશિયલ મીડિયાનો ઉપયોગ કરતા હોય છે, પરંતુ કીર્તિ પટેલનું આ નિવેદન તેની ઉદ્ધતાઈ કે પછી લોકોનું ધ્યાન ખેંચવા માટેનો કોઈ નવો સ્ટન્ટ છે, તે અંગે લોકોમાં તર્ક-વિતર્ક થઈ રહ્યા છે. પોતાને ખંડણીખોર ગણાવીને આ પ્રકારનું નિવેદન આપવું તે કાનૂની દ્રષ્ટિએ પણ ગંભીર બાબત ગણી શકાય.

જોકે, વીડિયો વાયરલ થયા બાદ હવે સોશિયલ મીડિયા યુઝર્સ પણ આકરી પ્રતિક્રિયા આપી રહ્યા છે. કેટલાક લોકો તેને પબ્લિસિટી મેળવવાની સસ્તી તરકીબ ગણાવી રહ્યા છે, તો કેટલાક લોકો પોલીસ તપાસની માંગ કરી રહ્યા છે કે શું ખરેખર તે આવા કોઈ ગેરકાયદેસર કામોમાં સંડોવાયેલી છે કે માત્ર ફેમસ થવા માટે બફાત કરી રહી છે.

અગાઉ પણ કીર્તિ પટેલ અનેક પોલીસ કેસ અને વિવાદોમાં સપડાઈ ચૂકી છે. તેમ છતાં, આવી રીતે જાહેરમાં પોતાની ગુનાહિત ઓળખ ઉભી કરવાનો પ્રયાસ કરવો તે સમાજમાં ખોટો સંદેશ આપે છે. હાલ તો આ વીડિયોના આધારે કાયદાકીય તપાસ થાય છે કે કેમ, તે જોવું રહ્યું. પરંતુ, એક વાત તો સ્પષ્ટ છે કે સોશિયલ મીડિયા પર 'લાઈક્સ' અને 'વ્યુઝ' ની ભૂખમાં લોકો કઈ હદ સુધી જઈ શકે છે, તેનું આ એક જીવંત ઉદાહરણ છે. હવે જોવાનું એ છે કે આ વિવાદિત નિવેદન બાદ પોલીસ તંત્ર આ 'સેલ્ફ-પ્રોક્લેમ્ડ' ખંડણીખોર સામે કોઈ કડક પગલાં ભરે છે કે પછી આ મામલો પણ માત્ર વાયરલ વીડિયો બનીને વિસરાઈ જશે.