અપ્રકાશિત પુસ્તક પરના વિવાદ વચ્ચે મૌન તોડ્યું- રાષ્ટ્રીય સુરક્ષાના નિર્ણયો CCS લે છે, લશ્કરી બાબતોમાં રાજકીય દખલ નથી

 સેના અને સરકાર વચ્ચેના અતૂટ વિશ્વાસનો પર્દાફાશ- વિપક્ષના આક્ષેપોને ફગાવતા પૂર્વ સેના પ્રમુખે કહ્યું: "સરકાર હંમેશા જવાનોની સાથે હતી"

અપ્રકાશિત સંસ્મરણોના અંશો પર સંસદમાં થયેલા હંગામા બાદ આર્મી ચીફની સ્પષ્ટતા- "સશસ્ત્ર દળોને રાજકારણથી દૂર રાખવા જોઈએ"

નવી દિલ્હી: ભારતીય સેનાના પૂર્વ ચીફ જનરલ મનોજ મુકુંદ નરવણેએ તેમના અપ્રકાશિત સંસ્મરણો "ફોર સ્ટાર્સ ઓફ ડેસ્ટિની" ને લઈને ચાલી રહેલા રાજકીય વિવાદ પર આખરે પોતાનું મૌન તોડ્યું છે. એક વિશેષ મુલાકાતમાં તેમણે સ્પષ્ટ કર્યું છે કે ૨૦૨૦ના ભારત-ચીન સરહદ વિવાદ દરમિયાન ભારતે પોતાની એક ઇંચ પણ જમીન ગુમાવી નથી. તેમણે વિપક્ષી નેતાઓ દ્વારા કરવામાં આવતા દાવાઓને ફગાવી દેતા જણાવ્યું કે, "મેં તે સમયે પણ કહ્યું હતું અને આજે પણ કહું છું કે આપણે કોઈ પ્રદેશ ગુમાવ્યો નથી. જો કોઈ તેને સ્વીકારવા માંગતું નથી, તો તે તેમની મરજી છે."

જનરલ નરવણેએ સૈન્ય અને રાજકારણને અલગ રાખવા પર ભાર મુકતા કહ્યું કે, રાષ્ટ્રીય સુરક્ષાના નિર્ણયો કેબિનેટ કમિટી ઓન સિક્યુરિટી (CCS) દ્વારા લેવામાં આવે છે અને સશસ્ત્ર દળોને રાજકીય વિવાદોમાં ન ખેંચવા જોઈએ. તેમણે લદ્દાખ ગતિરોધ દરમિયાન વડાપ્રધાન નરેન્દ્ર મોદીની ભૂમિકા અંગે જણાવ્યું કે, પીએમએ સેનાને સ્પષ્ટ સૂચના આપી હતી કે સરહદ પરની સ્થિતિને જોતા લશ્કરને જે યોગ્ય લાગે તે નિર્ણય લેવાની છૂટ છે. આ નિર્દેશ સરકારનો સેના પ્રત્યેનો અતૂટ વિશ્વાસ દર્શાવે છે.

ઉલ્લેખનીય છે કે કોંગ્રેસ નેતા રાહુલ ગાંધીએ સંસદના બજેટ સત્રમાં જનરલ નરવણેના પુસ્તકના અંશો ટાંકીને સરકાર પર પ્રહારો કર્યા હતા, જેની સામે ભાજપે આકરો વાંધો ઉઠાવ્યો હતો. પ્રકાશકોએ હવે તે પુસ્તકને વેચાણ માટે બંધ રાખ્યું છે, પરંતુ આ જ મહિને જનરલ નરવણેનું નવું પુસ્તક "ધ ક્યુરિયસ એન્ડ ધ ક્લાસિફાઇડ: અનઅર્થિંગ મિલિટરી મિથ્સ એન્ડ મિસ્ટ્રીઝ" બજારમાં આવ્યું છે. પૂર્વ આર્મી ચીફે એ વાત પર ભાર મૂક્યો છે કે સરકાર અને આખું દેશ તે કટોકટીના સમયે મક્કમતાથી સેનાની પાછળ ઊભા હતા, જેના પરિણામે ભારતે ચીની સેનાનો મજબૂત સામનો કર્યો હતો.