64 ઉમેદવારોમાં ભયનો માહોલ- ફોન પર ધમકાવવા અને ગેરકાયદે અટકાયતની દહેશત; ચૂંટણી પંચ પાસે માંગી સુરક્ષા

 સત્તાધારી પક્ષ દ્વારા નાણાકીય લાલચ અને વહીવટી ડર બતાવવાની આશંકા- તમામ 16 વોર્ડમાં પારદર્શિતા જળવાય તે માટે રજૂઆત

લોકશાહીના પર્વ પર જોખમ- પોલીસ તંત્ર કોઈના દબાણમાં કામ ન કરે તેવી અપીલ; કોંગ્રેસના 64 ઉમેદવારોની સુરક્ષાનો મુદ્દો તેજ

જામનગર: ગુજરાતમાં આવતીકાલે યોજાનારી સ્થાનિક સ્વરાજ્યની ચૂંટણીના ગણતરીના કલાકો બાકી છે ત્યારે જામનગર મહાનગરપાલિકાના જંગમાં કોંગ્રેસે સત્તાધારી પક્ષ ભાજપ પર સરકારી મશીનરીના દુરુપયોગનો ગંભીર આક્ષેપ કર્યો છે. જામનગર કોંગ્રેસના નેતાઓએ આજે જિલ્લા કલેક્ટર અને રાજ્ય ચૂંટણી આયોગને આવેદનપત્ર પાઠવીને રજૂઆત કરી છે કે, પ્રશાસન અને પોલીસ તંત્ર દ્વારા કોંગ્રેસના ઉમેદવારોને ટાર્ગેટ કરવામાં આવી રહ્યા છે.

આવેદનપત્રમાં પૂર્વ સાંસદ વિક્રમ માડમ અને શહેર પ્રમુખ દિગુભા જાડેજાએ જણાવ્યું છે કે, જામનગરના તમામ ૧૬ વોર્ડના કોંગ્રેસના ૬૪ ઉમેદવારોમાં હાલમાં ભયનો માહોલ છે. કોંગ્રેસને એવી દહેશત છે કે પોલીસ દ્વારા ઉમેદવારોને ફોન કરીને ધમકાવવામાં આવી શકે છે અથવા તો મતદાનના દિવસે તેમને પ્રચાર કરતા રોકવા માટે અજ્ઞાત સ્થળે લઈ જઈ અટકાયત કરવામાં આવી શકે છે. પક્ષે આશંકા વ્યક્ત કરી છે કે ભાજપ નાણાકીય લાલચ આપીને અથવા વહીવટી તંત્રનો ડર બતાવીને મતદારોને પ્રભાવિત કરવાનો પ્રયાસ કરી રહ્યો છે.

કોંગ્રેસના આગેવાનોએ વધુમાં જણાવ્યું હતું કે, ચૂંટણી એ લોકશાહીનું રાષ્ટ્રીય પર્વ છે અને તે ભારતીય બંધારણની જોગવાઈઓ મુજબ સંપૂર્ણપણે નિષ્પક્ષ રીતે યોજાવી જોઈએ. પોલીસ તંત્રએ કોઈ પણ પક્ષના દબાણ વગર માત્ર કાયદા મુજબ જ કામ કરવું જોઈએ તેવી અપીલ કરવામાં આવી છે. લીગલ સેલના જયેન્દ્રસિંહ ઝાલાએ પણ ઉમેર્યું હતું કે, પારદર્શક ચૂંટણી પ્રક્રિયા જાળવી રાખવી એ ચૂંટણી આયોગની નૈતિક જવાબદારી છે.

ચૂંટણીના અંતિમ તબક્કે કોંગ્રેસ દ્વારા કરવામાં આવેલા આ આક્ષેપોથી જામનગરના રાજકારણમાં ગરમાવો આવી ગયો છે. હવે જ્યારે રવિવારે મતદાન થવાનું છે, ત્યારે તંત્ર આ આવેદનપત્રને ધ્યાને લઈ કેવી સુરક્ષા અને પારદર્શિતા સુનિશ્ચિત કરે છે તેના પર સૌની નજર રહેશે. કોંગ્રેસે સ્પષ્ટ કર્યું છે કે જો કોઈપણ પ્રકારની અન્યાયી કાર્યવાહી થશે તો તેઓ કાયદાકીય લડત આપવા માટે પણ તૈયાર છે.