• અંતે સત્યનો વિજય..
• ષડયંત્રમાં ઘણા અધિકારીઓ સામેલ
• FIR કરનાર આશુતોષ બ્રહ્મચારીએ કહ્યું કે, રામભદ્રાચાર્યના શિષ્યોના દબાણમાં નકલી ફરિયાદ કરાવી

શંકરાચાર્ય અવિમુક્તેશ્વરાનંદ વિરુદ્ધ બે બટુકો દ્વારા યૌન શોષણનો કેસ દાખલ કરાવનાર આશુતોષ બ્રહ્મચારી મહારાજ પોતાના આરોપો પરથી પાછા હટી ગયા છે. તેમણે મંગળવારે ફેસબુક પર એક વીડિયો જાહેર કરીને કહ્યું, જગદ્ગુરુ રામભદ્રાચાર્યના ઉત્તરાધિકારી રામચંદ્ર દાસે દબાણ કરીને તેમની પાસે અવિમુક્તેશ્વરાનંદ વિરુદ્ધ ખોટો કેસ દાખલ કરાવ્યો હતો. આશુતોષ બ્રહ્મચારીએ દાવો કર્યો કે તેમને ગેરમાર્ગે દોરીને આ મામલામાં સામેલ કરવામાં આવ્યા હતા. ષડયંત્રમાં કેટલાક અધિકારીઓ પણ સામેલ હતા. તેમની પાસે આ સંબંધિત પુરાવા અને વોટ્સએપ ચેટ્સ ઉપલબ્ધ છે. ટૂંક સમયમાં જ તેઓ સમગ્ર મામલાનો ખુલાસો કરશે અને જણાવશે કે તેમને આ વિવાદમાં શા માટે અને કેવી રીતે સામેલ કરવામાં આવ્યા. તેમણે એમ પણ કહ્યું કે જો તેમના ગુરુ જગદ્ગુરુ રામભદ્રાચાર્યને કોઈ નુકસાન પહોંચે છે, તો તેના માટે રામચંદ્ર દાસ જવાબદાર હશે. આશુતોષ બ્રહ્મચારી મહારાજે રામચંદ્ર દાસ પર ગંભીર આરોપો લગાવ્યા છે.

તેમણે કહ્યું કે રામચંદ્ર દાસ તેમનો ગુરુ ભાઈ છે, પરંતુ તે કુકર્મી, ઢોંગી અને ફ્રોડ છે. આ તેમનું દુર્ભાગ્ય છે કે તેઓ તેના સંપર્કમાં આવ્યા. આશુતોષે કહ્યું કે તેઓ જગદ્ગુરુ રામભદ્રાચાર્યનું સન્માન કરે છે અને જીવનભર કરતા રહેશે, પરંતુ તેમની વિરૂદ્ધ ષડયંત્ર રચવામાં આવી રહ્યું છે. તેમણે દાવો કર્યો કે રામચંદ્ર દાસે નકલી વસિયત બનાવીને શ્રી દેવ બાબાજી આશ્રમ પર કબજો કર્યો છે. આ મામલે તેમણે મથુરા એસએસપીને ફરિયાદ મોકલી છે. આશુતોષનું કહેવું છે કે જો પોલીસ રિપોર્ટ નોંધતી નથી તો તેઓ કોર્ટનો આશ્રય લેશે. તેમણે કહ્યું કે તેઓ સત્યની લડાઈ લડશે અને જેમ અવિમુક્તેશ્વરાનંદ વિરુદ્ધ કાનૂની લડાઈ લડી હતી, તેમ જ રામચંદ્ર દાસ વિરુદ્ધ પણ અદાલતમાં લડશે.