• કોર્ટે કહ્યું- નક્કર પુરાવા વિના તપાસ એજન્સીઓએ સત્તાનો મનસ્વી દુરુપયોગ કર્યો
• હાઈકોર્ટનો મોટો પ્રહાર: છેતરપિંડીના કેસમાં કોઈ પક્ષ ભોગ બન્યો જ નથી, ફરિયાદ પણ નહોતી
• અમેરિકન કંપની પાસેથી મળેલા 9.59 કરોડના વિદેશી ફંડિંગ કેસમાં ન્યૂઝ પોર્ટલને મોટી રાહત

સિટી ન્યુઝ @ નવી દિલ્હી: દિલ્હી હાઈકોર્ટે એક મહત્વપૂર્ણ ચુકાદો આપતા મીડિયા સંસ્થા ‘ન્યૂઝક્લિક’ અને તેના સ્થાપક-સંપાદક પ્રબીર પુરકાયસ્થ વિરુદ્ધ વિદેશી ફંડિંગ કેસમાં આર્થિક ગુના શાખા (EOW) ની FIR અને એન્ફોર્સમેન્ટ ડિરેક્ટોરેટ (ED) ની મની લોન્ડરિંગ તપાસને સંપૂર્ણપણે રદ કરી દીધી છે. જસ્ટિસ નીના બંસલ કૃષ્ણાની સિંગલ બેન્ચે આ મામલે આકરા પ્રહારો કરતા જણાવ્યું હતું કે, આ કાનૂની કાર્યવાહી સ્વતંત્ર અને નિષ્પક્ષ પત્રકારત્વ પર સત્તાઓનો મનસ્વી હુમલો અને દુરુપયોગ હતો. કોર્ટે સ્પષ્ટ કર્યું કે તપાસ એજન્સીઓ કોઈ પણ નક્કર પુરાવા વિના વ્યાપક તપાસ કરતી રહી અને આવી FIR ચાલુ રાખવી એ કાયદાનો ઘોર દુરુપયોગ છે.

અદાલતે અવલોકન કર્યું હતું કે, FIRમાં લગાવવામાં આવેલા આરોપોને જો સાચા માની લેવામાં આવે તો પણ ટેકનિકલ રીતે છેતરપિંડી અને વિશ્વાસઘાતનો કોઈ ગુનાહિત કેસ બનતો નથી. સામાન્ય રીતે છેતરપિંડીના કેસમાં કોઈ એવો પક્ષ હોવો જોઈએ જેની સાથે છેતરપિંડી થઈ હોય, પરંતુ આ કિસ્સામાં વહીવટી તંત્ર પાસે કોઈ પીડિત પક્ષની ફરિયાદ જ નહોતી. ઉલ્લેખનીય છે કે દિલ્હી પોલીસે ઓગસ્ટ 2020માં ગુનો નોંધી આરોપ લગાવ્યો હતો કે વેબસાઇટને એક અમેરિકન કંપની પાસેથી 9.59 કરોડ રૂપિયાનું પ્રત્યક્ષ વિદેશી રોકાણ (FDI) મળ્યું હતું. 10 રૂપિયાના શેરને 11,510 રૂપિયાની પ્રીમિયમ કિંમતે ખરીદીને ભારતીય મીડિયામાં 26% FDIની મર્યાદાના નિયમોનું ઉલ્લંઘન કરાયું હોવાનો દાવો કરાયો હતો.

ત્યારબાદ EDએ PMLA હેઠળ ન્યૂઝક્લિકની ઓફિસો અને ડિરેક્ટરોના ઠેકાણાઓ પર દરોડા પાડીને ડિજિટલ પુરાવા જપ્ત કર્યા હતા અને 3 વર્ષમાં કુલ 38.05 કરોડ રૂપિયાનું વિદેશી ફંડ મળ્યું હોવાનો ખુલાસો કર્યો હતો. આ વિવાદ ઓગસ્ટ 2023માં વધુ વકર્યો જ્યારે સંસદમાં ન્યૂઝ પોર્ટલ પર ચીની પ્રોપેગન્ડા ફેલાવવાનો આરોપ લાગ્યો અને ત્યારબાદ ઓક્ટોબરમાં પુરકાયસ્થની UAPA હેઠળ ધરપકડ કરવામાં આવી હતી. આ કેસમાં દિલ્હી પોલીસે 46 લોકોની પૂછપરછ કરી હતી અને 31 ઠેકાણાઓ પર તપાસ કરી હતી. જોકે, હાઈકોર્ટના આ તાજા આદેશથી તપાસ એજન્સીઓની આખી થિયરી ભોંયભેગી થઈ ગઈ છે અને ન્યૂઝક્લિકને કાનૂની મોરચે મોટી જીત મળી છે.