=> વાસી ખોરાક છે તો નાશ કેમ કરો છો સેમ્પલ લઈને કેમ નથી મોકલતા

• તંત્રી •અનિરુદ્ધ નકુમ

રાજકોટમાં ખાદ્ય સુરક્ષાની હકીકત હવે ખુલ્લી પડી રહી છે. એક તરફ મહાનગર પાલિકા “કડક કાર્યવાહી”ના દાવા કરે છે, અને બીજી તરફ રિલાયન્સ મોલમાંથી લેવાયેલા શંકાસ્પદ લોટના સેમ્પલનો રિપોર્ટ ૪૨૫ દિવસ સુધી ગાયબ રહે છે. આ માત્ર વિલંબ નથી. આ સમગ્ર સિસ્ટમની નિષ્ફળતા અને શંકાસ્પદ કામગીરીનું જીવંત ઉદાહરણ છે. પ્રશ્ન સીધો છે. રિપોર્ટ ક્યાં છે? જો લેબોરેટરી પાસે છે, તો જાહેર કેમ નથી? અને જો નથી, તો સવા વર્ષથી શું ચાલી રહ્યું હતું? આ મૌન પોતે જ અનેક શંકાઓ ઊભી કરે છે. શું કોઈને બચાવવામાં આવી રહ્યું છે? કે પછી તંત્ર પોતાની બેદરકારી છુપાવવા પ્રયત્ન કરી રહ્યું છે?

આ કેસ માત્ર એક ઘટના નથી. શહેરમાં ચાલતી “દરોડા રાજનીતિ” પણ હવે સવાલો હેઠળ આવી ગઈ છે. હોટેલ અને રેસ્ટોરન્ટમાં જઈને ખોરાકનો નાશ કરી દેવામાં આવે છે, પરંતુ સેમ્પલ લેવામાં આવતા નથી. કેમ? કારણ સરળ છે. સેમ્પલ લેવાય તો કાયદેસર કાર્યવાહી કરવી પડે અને કદાચ એ જ જવાબદારીથી બચવા માટે “નાશ કરો અને મુદ્દો પૂરો કરો” જેવી વ્યવસ્થા ઉભી થઈ ગઈ છે.

ફૂડ વિભાગ પોતાની મર્યાદિત સત્તાનો બહાનો આપે છે, પરંતુ સવાલ એ છે. જવાબદારી કોણ લેશે? ગંદકીના નામે દંડ વસૂલવામાં આવે છે, પરંતુ ખાદ્ય ગુણવત્તા જેવા ગંભીર મુદ્દાઓ પર આંખ આડા કાન કરવામાં આવે છે. આ માત્ર તંત્રની નબળાઈ નથી. આ સ્પષ્ટ બેદરકારી છે. આખરે સવાલ માત્ર એક જ છે શું રાજકોટના નાગરિકો સુરક્ષિત ખોરાક મેળવી રહ્યા છે કે નહીં? જો તેનો જવાબ તંત્ર સ્પષ્ટ આપી શકતું નથી, તો તમામ દાવાઓ બિનઅર્થપૂર્ણ છે. હવે સમય આવી ગયો છે સાચું બહાર લાવો, જવાબદારી નક્કી કરો અને સિસ્ટમને પારદર્શક બનાવો. નહીં તો લોકોનો વિશ્વાસ તૂટશે અને એ વિશ્વાસ પાછો મેળવવો સરળ નહીં રહે.

મેયરશ્રીની નીતિઓ સારી હોઈ શકે, પરંતુ જમીન પરના અધિકારીઓ જો હકીકત છુપાવે, અનાવશ્યક વિલંબ કરે અને ગેરરીતિઓને ઢાંકી રાખે, તો આખું તંત્ર ખોખલું બની જવું સ્વાભાવિક છે. હવે તો સીધી શંકા ઊભી થાય છે. શું અધિકારીઓ જ “ઊંધા ચશ્મા” પહેરાવીને સાચી સ્થિતિથી દૂર રાખી રહ્યા છે?

જો તંત્ર પાસે છુપાવવાનું કંઈ નથી, તો માત્ર બે સીધા જવાબ આપી દે અત્યાર સુધી કુલ કેટલા ખાદ્ય સેમ્પલ લેવામાં આવ્યા છે? અને તેમાંથી કેટલા કેસોમાં દોષિતોને ખરેખર સજા કરવામાં આવી છે? બસ, આટલી પારદર્શિતા રાખો, સચાઈ પોતે જ બહાર આવી જશે.