• મિસાઈલ હુમલા બાદ અરામકોના મુખ્ય ભવનમાં આગ લાગી.

• હુથી વિદ્રોહીઓના હુમલાથી મધ્ય પૂર્વમાં તણાવ વધ્યો.

• સાઉદી ગઠબંધન સેનાએ અનેક મિસાઈલો હવામાં તોડી.

 સિટી ન્યુઝ @ રિયાદ

સાઉદી અરેબિયા અને યમનના ઈરાન સમર્થિત હુથી વિદ્રોહીઓ વચ્ચેનો સંઘર્ષ હવે અત્યંત ખતરનાક તબક્કામાં પહોંચી ગયો છે. મંગળવારે મોડી રાત્રે સાઉદી અરેબિયાના પૂર્વીય શહેર ધહરાનમાં આવેલી વિશ્વની સૌથી મોટી ઓઇલ કંપની 'સાઉદી અરામકો'ના વહીવટી સંકુલને બેલિસ્ટિક મિસાઈલથી નિશાન બનાવવામાં આવ્યું છે.

સાઉદી સરકારી સમાચાર એજન્સી અને ઊર્જા મંત્રાલયના જણાવ્યા અનુસાર, મિસાઈલ હુમલા બાદ અરામકોના મુખ્ય ભવનમાં આગ ફાટી નીકળી હતી અને આ હુમલામાં કંપનીની ઓફિસ બિલ્ડિંગના ઉપરના ત્રણ માળ ક્ષતિગ્રસ્ત થયા છે. સત્તાવાર સૂત્રોના હવાલેથી રાહતની વાત એ છે કે આ ગંભીર હુમલામાં કોઈ જાનહાનિ થઈ નથી.

સાઉદી ગઠબંધન સેનાએ જણાવ્યું છે કે ધહરાન પર હુમલા માટે છોડવામાં આવેલી મિસાઈલના કેટલાક ટુકડા એક રેસિડેન્શિયલ વિસ્તારમાં પણ પડ્યા છે. આ ઉપરાંત, સત્તાવાળાઓએ રાજધાની રિયાદ અને દેશના દક્ષિણી ભાગોમાં પણ હુથીઓની અનેક મિસાઈલો અને ડ્રોનને હવામાં જ રોકીને નષ્ટ કરવાનો દાવો કર્યો છે.

અત્રે ઉલ્લેખનીય છે કે અગાઉ શનિવારે રિયાદ એરપોર્ટ પર થયેલા બેલિસ્ટિક મિસાઈલ હુમલામાં ૧૩ લોકોનાં મોત થયા હતા, જેને છેલ્લા એક દશકથી વધુ સમયમાં સાઉદી અરેબિયાની ધરતી પર થયેલો સૌથી ઘાતક હુમલો માનવામાં આવે છે.