65 લાખ ટન કોલસાની રાખમાંથી તૈયાર થયો દેશનો સૌથી સ્માર્ટ હાઈવે- 519 ગામોને મળશે હાઈસ્પીડ 5G કનેક્ટિવિટી

 ઓપ્ટિકલ ફાઈબર અને ગેસ પાઈપલાઈન માટે અદભૂત એન્જિનિયરિંગ- 18 લાખ વૃક્ષો સાથે પર્યાવરણને બચાવવાનો ભગીરથ પ્રયાસ

ફળદ્રુપ માટી બચાવવા ગ્રીન ટેકનોલોજીનો ઉપયોગ- 120 કિમીની ઝડપે દોડતા વાહનો પણ રહેશે સુરક્ષિત; સ્માર્ટ ટ્રાફિક સિસ્ટમ તૈનાત

ઉત્તર પ્રદેશના આર્થિક ચિત્રને બદલવા જઈ રહેલો ગંગા એક્સપ્રેસવે આજે એન્જિનિયરિંગ અને આધુનિક ટેકનોલોજીનો એક અદભૂત નમૂનો બનીને ઉભર્યો છે. આ એક્સપ્રેસવે માત્ર વાહનોની અવરજવર માટે જ નહીં, પરંતુ ડિજિટલ ક્રાંતિ માટે પણ તૈયાર કરવામાં આવ્યો છે. હાઈવેની સાથે 2 મીટર પહોળો યુટિલિટી કોરિડોર બનાવવામાં આવ્યો છે, જે ભવિષ્યમાં ઈન્ટરનેટ કેબલ કે ગેસ પાઈપલાઈન નાખવા માટે રસ્તાને ક્યારેય ખોદવો ન પડે તેની ખાતરી આપે છે. આ ડિજિટલ નેટવર્કથી રાજ્યના 519 ગામોને હાઈસ્પીડ 5G કનેક્ટિવિટીનો લાભ મળશે, જે ગ્રામીણ અર્થતંત્રને નવી ઊંચાઈઓ પર લઈ જશે.

સુરક્ષાના મામલે આ એક્સપ્રેસવે દુનિયાના શ્રેષ્ઠ હાઈવેને ટક્કર આપે છે. અહીં લગાવવામાં આવેલી આર્ટિફિશિયલ ઈન્ટેલિજન્સ (AI) આધારિત સ્માર્ટ ટ્રાફિક મેનેજમેન્ટ સિસ્ટમ (STMS) કોઈ પણ અકસ્માત કે નિયમભંગની સ્થિતિમાં સેકન્ડોમાં કંટ્રોલ રૂમને એલર્ટ મોકલે છે. જો કોઈ વાહન હાઈવે પર 2 મિનિટથી વધુ સમય માટે સ્થિર જોવા મળે, તો AI સીધું તેનું લોકેશન નજીકના પેટ્રોલિંગ યુનિટને મોકલી દે છે, જેથી કોઈ પણ ઈમર્જન્સીમાં મુસાફરોને મદદ માટે ફોન કરવાની પણ રાહ જોવી પડતી નથી.

પર્યાવરણની જાળવણી માટે એન્જિનિયરોએ આ પ્રોજેક્ટમાં એક ક્રાંતિકારી પ્રયોગ કર્યો છે. એક્સપ્રેસવેના નિર્માણમાં અંદાજે 70 લાખ ટન ફ્લાય એશ (કોલસાની રાખ) નો ઉપયોગ કરવામાં આવ્યો છે, જે સામાન્ય રીતે પર્યાવરણને પ્રદૂષિત કરતી હોય છે. આ અભિગમને કારણે 120 લાખ ઘન મીટર ફળદ્રુપ માટીનો બચાવ થયો છે. સાથે જ હાઈવેની બંને બાજુ 18 લાખ વૃક્ષો વાવીને તેને એક ‘ગ્રીન કોરિડોર’ નું સ્વરૂપ આપવામાં આવ્યું છે, જે પર્યાવરણીય સંતુલન જાળવવામાં મદદરૂપ સાબિત થશે.

વૈશ્વિક સ્તરે નોંધ લેવાય તે રીતે, ગંગા એક્સપ્રેસવે પર માત્ર 24 કલાકમાં 10.3 કિમી લાંબો કોંક્રિટ ક્રેશ બેરિયર બનાવીને વર્લ્ડ રેકોર્ડ સ્થાપિત કરવામાં આવ્યો છે. આ બેરિયર એટલા મજબૂત છે કે 120 કિમીની ઝડપે દોડતા વાહનોની ટક્કરને પણ આસાનીથી ઝીલી શકે છે, જે માર્ગ અકસ્માત દરમિયાન જાનહાનિ ઘટાડવામાં મહત્વની ભૂમિકા ભજવશે. આ ઉપરાંત પીએમ ઉર્જા ગંગા પરિયોજના હેઠળ ગેસ પાઈપલાઈન બિછાવવામાં આવી છે જે સ્થાનિક ઉદ્યોગોને સસ્તું ઈંધણ પૂરું પાડશે.

આમ, ગંગા એક્સપ્રેસવે એ માત્ર ઉત્તર પ્રદેશ માટે જ નહીં પણ આખા દેશ માટે ઇન્ફ્રાસ્ટ્રક્ચરનું એક નવું મોડેલ પૂરું પાડે છે. તે સાબિત કરે છે કે જો ટેકનોલોજી અને પર્યાવરણનો યોગ્ય સમન્વય કરવામાં આવે તો વિકાસની ગતિની સાથે ધરતીને પણ સુરક્ષિત રાખી શકાય છે. આગામી દિવસોમાં આ એક્સપ્રેસવે ઉત્તર પ્રદેશમાં આર્થિક ક્રાંતિ લાવશે અને હજારો લોકોને રોજગારીની નવી તકો પૂરી પાડશે તે નિશ્ચિત છે.