રેલવે લાઇનના ચીરેચીરા ઉડ્યા- 100 મીટર સુધી વિખરાયા મૃતદેહના અંગો; ધમકી છતાં પોલીસની બેદરકારી આવી સામે

 બ્લાસ્ટની ધમકીને હળવાશથી લેવી પડી ભારે- NIA અને કેન્દ્રીય એજન્સીઓ ઘટનાસ્થળે; મોટી રેલ દુર્ઘટનાનું હતું ષડયંત્ર

પોલીસ તપાસમાં ચોંકાવનારો ખુલાસો- એક અઠવાડિયા પહેલા મળી હતી ધમકી; GRP અને RPF દ્વારા સમગ્ર રૂટ પર સર્ચ ઓપરેશન

પટિયાલા: પંજાબના રાજપુરા-શંભુ રેલવે સ્ટેશન નજીક ગત રાત્રે એક ભયાનક IED વિસ્ફોટ થતા સમગ્ર વિસ્તારમાં સનસનાટી મચી ગઈ છે. અંબાલાથી અમૃતસર જતી રેલ ફ્રેટ કોરિડોર લાઇન પર રાત્રે આશરે ૮:૩૦ વાગ્યે આ વિસ્ફોટ થયો હતો, જેમાં રેલવે ટ્રેકને ભારે નુકસાન પહોંચ્યું છે. ચોંકાવનારી બાબત એ છે કે ટ્રેક પર બોમ્બ પ્લાન્ટ કરવા આવેલો શખ્સ પોતે જ આ વિસ્ફોટમાં ફૂંકાઈ ગયો હતો. પોલીસને ઘટનાસ્થળથી આશરે ૧૦૦ મીટરના વિસ્તારમાં માનવ શરીરના ટુકડા વિખરાયેલા મળ્યા છે.

પોલીસ તપાસમાં મૃતકની ઓળખ તરનતારણ જિલ્લાના પંજવાર ગામના રહેવાસી જગરુપ સિંહ તરીકે થઈ છે. પ્રાથમિક તપાસ મુજબ, જગરુપ સિંહ રેલવે ટ્રેક પર IED ગોઠવી રહ્યો હતો ત્યારે જ કોઈ ટેકનિકલ ખામી કે અચાનક થયેલા ટ્રિગરને કારણે બોમ્બ ફાટ્યો હતો અને તે પોતે જ મોતને ભેટ્યો હતો. જો આ વિસ્ફોટ ટ્રેન પસાર થતી વખતે થયો હોત તો મોટી હોનારત સર્જાઈ શકી હોત. ઘટનાની ગંભીરતાને જોતા પંજાબ પોલીસની સાથે કેન્દ્રીય સુરક્ષા એજન્સીઓ પણ તપાસમાં જોડાઈ છે.

આ ઘટનામાં પોલીસની ઘોર બેદરકારી પણ સામે આવી રહી છે. રિપોર્ટ્સ મુજબ, એક અઠવાડિયા પહેલા જ રેલવે લાઈનો પર સુરક્ષા સંબંધિત ધમકીઓ મળી હતી. સ્થાનિક પોલીસે આ ધમકીને હળવાશથી લીધી હતી અને કોઈ નક્કર તપાસ કે પેટ્રોલિંગ વધાર્યું નહોતું. પોલીસની આ ઢીલી નીતિને કારણે જ શંકાસ્પદ તત્વો રેલવે ટ્રેક સુધી પહોંચવામાં સફળ રહ્યા હતા. હાલમાં GRP અને RPF દ્વારા આખા રૂટ પર સર્ચ ઓપરેશન ચલાવવામાં આવી રહ્યું છે.

ઘટનાસ્થળે પહોંચેલી ફોરેન્સિક ટીમે વિસ્ફોટમાં વપરાયેલા વિસ્ફોટકોના નમૂના લીધા છે. આ આત્મઘાતી હુમલા પાછળ કોઈ આતંકી સંગઠનનો હાથ છે કે કેમ તે દિશામાં તપાસ તેજ કરવામાં આવી છે. જગરુપ સિંહના મોબાઈલ લોકેશન અને તેના સંપર્કોની પણ તપાસ કરવામાં આવી રહી છે જેથી આ ષડયંત્રના મૂળ સુધી પહોંચી શકાય. રેલવે ટ્રેક તૂટી જવાને કારણે માલગાડીઓના પરિવહન પર પણ અસર પડી છે અને યુદ્ધના ધોરણે સમારકામ શરૂ કરાયું છે.

પંજાબમાં છેલ્લા કેટલાક સમયથી રેલવે અને અન્ય જાહેર મિલકતોને નિશાન બનાવવાની ધમકીઓ વધી રહી છે. રાજપુરાની આ ઘટનાએ રાજ્યની સુરક્ષા વ્યવસ્થા સામે અનેક સવાલો ઉભા કર્યા છે. કેન્દ્રીય એજન્સીઓ હવે એ તપાસ કરી રહી છે કે શું જગરુપ સિંહને સરહદ પારથી કોઈ સૂચનાઓ મળી રહી હતી. હાલમાં સમગ્ર પંજાબમાં રેલવે સ્ટેશનો અને મહત્વના સ્થળો પર ‘હાઈ-એલર્ટ’ જાહેર કરી દેવામાં આવ્યું છે.