સિટી ન્યુઝ @ નવી દિલ્હી

મધ્ય પૂર્વમાં ચાલી રહેલા યુદ્ધ અને વૈશ્વિક ઊર્જા સંકટની સીધી અસર હવે બાંગ્લાદેશના સામાન્ય જનજીવન અને વેપાર-રોજગાર પર જોવા મળી રહી છે. દેશમાં ઝડપથી વધી રહેલી વીજળી અને ઈંધણની અછતને પહોંચી વળવા માટે બાંગ્લાદેશ સરકાર દ્વારા એક મોટો નિર્ણય લેવામાં આવ્યો છે. વીજળી, ઊર્જા અને ખનીજ સંસાધન મંત્રાલય દ્વારા જાહેર કરાયેલા નવા આદેશ અનુસાર હવેથી સમગ્ર દેશમાં તમામ શોપિંગ મોલ, બજારો અને દુકાનો રાત્રે 8 વાગ્યા પછી ખુલ્લા રાખી શકાશે નહીં.

સરકારના નવા નોટિફિકેશન મુજબ દેશભરમાં બજારો અને દુકાનોના કામકાજનો સમય સવારે 11 વાગ્યાથી રાત્રે 8 વાગ્યા સુધી જ સીમિત કરી દેવામાં આવ્યો છે. આ સિવાય ઊર્જાનો બગાડ અટકાવવા માટે સાંજે 7 વાગ્યા પછી તમામ પ્રકારના રોશનીવાળા હોર્ડિંગ્સ અને જાહેરાતના બિલબોર્ડ્સ બંધ કરવાનો આદેશ આપવામાં આવ્યો છે. સાથોસાથ કોઈપણ પ્રકારની સજાવટી લાઇટો પર પ્રતિબંધ મૂકવામાં આવ્યો છે અને દેશભરમાં યોજાતા મેળાઓ, ટ્રેડ ફેર તથા સાંસ્કૃતિક કાર્યક્રમોને પણ રાત્રે 8 વાગ્યા સુધીમાં પૂર્ણ કરવાની કડક સૂચના અપાઈ છે.

આ કડક નિયમો માત્ર રાજધાની ઢાકા પૂરતા મર્યાદિત નથી પરંતુ સમગ્ર દેશમાં એકસમાન રીતે લાગુ કરવામાં આવ્યા છે. ડિવિઝનલ કમિશનરો, ડેપ્યુટી કમિશનરો અને સિટી કોર્પોરેશનના અધિકારીઓને તેનો ચુસ્ત અમલ કરાવવાની જવાબદારી સોંપવામાં આવી છે. જોકે, આર્થિક અને જાહેર પ્રવૃત્તિઓ પર નિયંત્રણ લાવતી વખતે સામાન્ય જનતાને તકલીફ ન પડે તે માટે હોસ્પિટલો, મેડિકલ સ્ટોર્સ, ખાણી-પીણીની દુકાનો અને અન્ય આવશ્યક સેવાઓને આ નિયમોમાંથી સંપૂર્ણ મુક્તિ આપવામાં આવી છે.

બાંગ્લાદેશના મંત્રી નુરુલ હક નૂરે આ ઊર્જા સંકટ અંગે સ્પષ્ટતા કરતા જણાવ્યું હતું કે વર્તમાન પરિસ્થિતિ માટે હાલની સરકાર જવાબદાર નથી પરંતુ આ સમસ્યા તેમને અગાઉની શેખ હસીના સરકાર તરફથી વારસામાં મળી છે. આ ઉપરાંત પશ્ચિમ એશિયામાં ચાલી રહેલા તણાવને કારણે ઈંધણની આયાત પર માઠી અસર પડી છે. ગેસ અને ઈંધણની અછતને કારણે દેશના અનેક ભાગોમાં ભારે પાવર કટની સ્થિતિ સર્જાઈ છે, જેનાથી સ્થાનિક વીજ ઉત્પાદન પ્રભાવિત થયું છે.

હાલના ગંભીર સંકટમાંથી બહાર નીકળવા માટે બાંગ્લાદેશ સરકારે ભારત પાસે તાત્કાલિક મદદ માંગી છે. બાંગ્લાદેશના ઊર્જા મંત્રી ઇકબાલ હસન મહમૂદે ભારતીય હાઈકમિશનર પ્રણય વર્મા સાથે મુલાકાત કરીને ભારત-બાંગ્લાદેશ પાઈપલાઈન દ્વારા વધુ પ્રમાણમાં ડીઝલનો પુરવઠો પૂરો પાડવાની વિનંતી કરી છે. પશ્ચિમ એશિયાનું યુદ્ધ લાંબુ ખેંચાવાના સંજોગોમાં ઈંધણ પુરવઠો જાળવી રાખવા માટે બાંગ્લાદેશ ભારત સહિત અન્ય નવા સ્ત્રોતો પણ શોધી રહ્યું છે.

બાંગ્લાદેશમાં ઊર્જા સંકટને પગલે રાત્રિ બજારો પર નિયંત્રણ

પશ્ચિમ એશિયાના યુદ્ધને કારણે બાંગ્લાદેશમાં ગંભીર ઊર્જા સંકટ સર્જાયું છે. વીજળી બચાવવા સરકારે દેશભરમાં તમામ મોલ અને દુકાનો રાત્રે 8 વાગ્યા પછી બંધ રાખવાનો આદેશ આપ્યો છે. સાંજે 7 વાગ્યા પછી રોશનીવાળા બિલબોર્ડ્સ બંધ રહેશે. ઈંધણની અછત નિવારવા બાંગ્લાદેશે પાઇપલાઇન દ્વારા વધુ ડીઝલ સપ્લાય કરવા માટે ભારત સરકાર પાસે મદદની માંગ કરી છે.