સિટી ન્યુઝ @ બેઇજિંગ

ચીનના નાગરિક ઉડ્ડયન ક્ષેત્રના ઇતિહાસમાં એક નવો સીમાચિહ્નરૂપ અધ્યાય જોડાયો છે. ચીનમાં સંપૂર્ણપણે સ્વદેશી ટેકનોલોજીથી વિકસાવવામાં આવેલા પ્રથમ પેસેન્જર વિમાન C919 એ પોતાની પ્રથમ નિયમિત વ્યાપારી આંતરરાષ્ટ્રીય ઉડાન સફળતાપૂર્વક પૂર્ણ કરી છે.

ચીનના આ ઐતિહાસિક પગલાને વૈશ્વિક એવિએશન બજારમાં દાયકાઓથી પ્રભુત્વ ધરાવતી અમેરિકી કંપની બોઇંગ (Boeing) અને યુરોપીયન કંપની એરબસ (Airbus) ના એકાધિકાર (મોનોપોલી) સામેના સીધા પડકાર તરીકે જોવામાં આવી રહ્યું છે.

એર ચાઇનાની ફ્લાઇટ CA-723 એ બેઇજિંગ કેપિટલ ઇન્ટરનેશનલ એરપોર્ટ પરથી બપોરે આશરે 3:00 વાગ્યે ઉડાન ભરી હતી અને મંગોલિયાની રાજધાની ઉલાનબાતાર ખાતે નિર્ધારિત સમયે સુરક્ષિત લેન્ડિંગ કર્યું હતું. ત્યારબાદ આ વિમાન સાંજે મુસાફરો સાથે સફળતાપૂર્વક બેઇજિંગ પરત પહોંચ્યું હતું. ચીન હવે પોતાના સ્થાનિક પેસેન્જર વિમાનોનું વૈશ્વિક સ્તરે વિસ્તરણ કરવાની દિશામાં ઝડપથી આગળ વધી રહ્યું છે.

ચીનના C919 વિમાનની પ્રથમ આંતરરાષ્ટ્રીય ઉડાન

ચીને પોતાના દેશમાં વિકસાવેલા પેસેન્જર વિમાન C919 દ્વારા બેઇજિંગથી મંગોલિયા સુધી પ્રથમ આંતરરાષ્ટ્રીય વ્યાપારી ફ્લાઇટ સફળતાપૂર્વક પૂર્ણ કરી છે. એર ચાઇના દ્વારા સંચાલિત આ ફ્લાઇટ સાથે ચીને વૈશ્વિક એવિએશન સેક્ટરમાં બોઇંગ અને એરબસના દબદબાને મજબૂત પડકાર ફેંક્યો છે.