સુરત નાસીરનગર ડિમોલિશન વિવાદમાં નામ ઉછળ્યું હતું

• રાજકોટના ડીસીપી ઝોન-2 રાકેશ દેસાઈને IPS બઢતી

• ગુજરાત કેડરના 6 અધિકારીઓ IPS નોમિનેટ થયા

સિટી ન્યૂઝ@સુરત

સુરતના નાસીરનગર ડિમોલિશનના વિવાદમાં આવેલા ડીસીપી રાજદીપસિંહ નકુમને આઈપીએસ તરીકે પ્રમોટ કરવામાં આવ્યા છે. જો કે હાઈકોર્ટે ૨૫ જૂને ભૂતિયા ડિમોલિશન મામલે પૂછ્યું હતું કે, તમે કેમ હાજર હતા. જેના ૭ દિવસમાં જ સરકારે શિરપાવ આપી પ્રમોશન આપ્યું છે. આમ એક બાજુ હાઈકોર્ટ ખખડાવી રહી હતી તો બીજી બાજુ સરકારે તો શિરપાવ જ આપી દીધો. આ ઉપરાંત ભરતકુમાર રાઠોડ, પ્રફુલ વાણીયા, રાજેશકુમાર પરમાર, કલ્પેશ ચાવડા, રાકેશ દેસાઈને પ્રમોશન આપવામાં આવ્યું છે. કેન્દ્ર સરકારના ગૃહ મંત્રાલય (MHA) દ્વારા ગુજરાત પોલીસ સેવા છ અધિકારીઓને Select List-૨૦૨૬ હેઠળ ભારતીય પોલીસ સેવા (IPS) માં પ્રમોશન આધારે નિયુક્તિ આપતી સત્તાવાર અધિસૂચના જાહેર કરવામાં આવી છે. આ અધિકારીઓને ગુજરાત કેડરમાં એક વર્ષના પ્રોબેશન પર નિયુક્ત કરવામાં આવશે અને ત્યારબાદ જરૂરી ઇન્ડક્શન ટ્રેનિંગ પણ આપવામાં આવશે.

તંત્રીય ગૃહ મંત્રાલયની સૂચના અનુસાર તમામ અધિકારી એક વર્ષ સુધી પ્રોબેશન પર રહેશે અને ત્યારબાદ સરદાર વલ્લભભાઈ પટેલ નેશનલ પોલીસ એકેડમી સહિતના નિર્ધારિત કાર્યક્રમો હેઠળ ઇન્ડક્શન ટ્રેનિંગ પૂર્ણ કરશે. નાસીરનગર ડિમોલિશન મામલે હાઈકોર્ટમાં ૨૫ જૂને યોજાયેલી સુનાવણીમાં અરજદારના વકીલ દ્વારા કોર્ટ સમક્ષ રજૂઆત કરવામાં આવી હતી કે કોઈપણ નોટિસ, રજૂઆતની તક કે પંચનામા વગર સુરતના નાસીર નગરમાં SMC દ્વારા ૧૫૦થી વધુ મકાનો ૩૦ મેના રોજ તોડી પાડવામાં આવ્યા હતા. કોર્ટે પૂછ્યું હતું કે, જો ડિમોલિશન SMC એ નથી કર્યું તો ત્યાં તેના કર્મચારીઓ શું કરતા હતા?, તેમની સામે શું પગલાં લેવામાં આવ્યા છે? 

સુરત શહેર પોલીસ કમિશનરે ફરિયાદ અપાઈ તો તે ફરિયાદ લીધી કેમ નહીં?, આ અધિકારીઓ ડિમોલિશન સ્થળે ઉપસ્થિત હતા?, અરજદારે ડિમોલિશન સ્થળે હાજર પોલીસ કર્મચારીઓના નામ છે હોદ્દા કેમ નથી જણાવ્યા? અરજદારે જણાવ્યું હતું કે, ત્યાં સુરત SOGના DCP રાજદીપસિંહ નકુમ હાજર હતા. કોર્ટે પૂછ્યું હતું એક તેમના સામે અરજીમાં આક્ષેપ ક્યાં છે? આ અરજીમાં ઘણા ખાનગી વ્યક્તિઓને જોડવામાં આવ્યા છે, તેમની સામે આક્ષેપ ક્યાં છે? ક્યાં આધાર ઉપર કોર્ટ અધિકારીઓને જવાબ આપવા બોલાવે!