• ડ્રોન હુમલા બાદ રશિયામાં પેટ્રોલની તંગી, ભારત તરફથી 60 હજાર મેટ્રિક ટનનો જથ્થો રવાના
• રિફાઇનરીઓ પર હુમલાથી રશિયા બેહાલ, પેટ્રોલની અછત પૂરી કરવા ભારત પર નજર
• ભારત રશિયાને ગેસોલિન સપ્લાય કરનારું મોટું કેન્દ્ર બન્યું, જૂનમાં ક્રૂડની આયાત રેકોર્ડ સ્તરે

સિટી ન્યૂઝ @ નવી દિલ્હી

ભારતે રશિયા સાથેની પોતાની દાયકાઓ જૂની મૈત્રી નિભાવતા ફરી એકવાર સંકટના સમયમાં મદદનો હાથ લંબાવ્યો છે. યુક્રેન દ્વારા રશિયાની ઓઇલ રિફાઇનરીઓ પર કરવામાં આવેલા સતત ડ્રોન હુમલાઓને કારણે રશિયામાં ઇંધણની ભારે અછત સર્જાઈ છે. આ પરિસ્થિતિને પહોંચી વળવા માટે રશિયાએ હવે ભારત પાસેથી દરિયાઈ માર્ગે પેટ્રોલ (ગેસોલિન) આયાત કરવાનું શરૂ કર્યું છે. રિપોર્ટ્સ અનુસાર, ભારતે અત્યાર સુધીમાં 60 હજાર મેટ્રિક ટન પેટ્રોલ રશિયા રવાના કરી દીધું છે.

રશિયામાં ઉનાળાની સીઝન દરમિયાન ઇંધણની માંગમાં મોટો વધારો જોવા મળે છે, પરંતુ સ્થાનિક ઉત્પાદન ક્ષમતાને નુકસાન થવાથી દેશમાં પેટ્રોલ પંપો પર વાહનોની લાંબી લાઈનો અને રેશનિંગ જેવી સ્થિતિ જોવા મળી રહી છે. પુતિન સરકારે હવે આયાતને પ્રોત્સાહન આપવા માટે ટેક્સ નિયમોમાં પણ ફેરફાર કર્યો છે. આ સંકટના સમયે ભારત રશિયા માટે વિશ્વસનીય પુરવઠાકાર તરીકે સામે આવ્યું છે.

આ સમગ્ર ઘટનાક્રમમાં એક રસપ્રદ પાસું એ પણ છે કે, ભારત એક તરફ રશિયાને તૈયાર પેટ્રોલ મોકલી રહ્યું છે, તો બીજી તરફ રશિયાના ક્રૂડ ઓઇલનો ભારત વિશ્વમાં સૌથી મોટો ખરીદદાર પણ છે. જૂન મહિનામાં ભારતે રશિયા પાસેથી દૈનિક 27 લાખ બેરલ ક્રૂડ ઓઇલની આયાત કરી છે, જે એક નવો રેકોર્ડ છે. ભારતની આયાતમાં રશિયન ઓઇલનો હિસ્સો હવે 50 ટકાથી વધુ થઈ ગયો છે, જે બંને દેશો વચ્ચેના મજબૂત વ્યૂહાત્મક સંબંધોને દર્શાવે છે.

ઇંધણની કટોકટી અને ભારતનું યોગદાન

રશિયામાં રિફાઇનરીઓ પરના હુમલાઓએ દેશના સ્થાનિક ઇંધણ માળખાને ગંભીર અસર કરી છે. સામાન્ય રીતે દરરોજ 1.10 લાખ ટન ગેસોલિનની જરૂરિયાત ધરાવતા રશિયા માટે આયાત કરવી અનિવાર્ય બની છે. ભારત દ્વારા કરવામાં આવેલો આ સપ્લાય રશિયન નાગરિકો અને અર્થતંત્રને મોટી રાહત આપશે. આ વ્યવહાર માત્ર વેપારી નથી, પરંતુ બદલાતા વૈશ્વિક ભૂ-રાજકીય સંજોગોમાં ભારત અને રશિયા વચ્ચેની પરસ્પર નિર્ભરતા અને મજબૂત મિત્રતાનું પ્રતીક છે.