સોનિયાએ લખ્યું આ પુસ્તક પરિવારની માનવતાને સમર્પિત

સિટી ન્યૂઝ@નવી દિલ્હી

કોંગ્રેસના પૂર્વ અધ્યક્ષ સોનિયા ગાંધીના સંસ્મરણો પર લખાયેલું પુસ્તક Belonging: A Journey of Love ૧૦ નવેમ્બરના રોજ પ્રકાશિત થશે. પ્રકાશક આલ્ફ્રેડ એ નોફે મંગળવારે જાહેરાત કરી. પુસ્તકમાં સોનિયા રાજકારણમાં પોતાની સફર અને ૨૦૦૪માં વડાપ્રધાન પદ સ્વીકાર ન કરવાના નિર્ણય સાથે જોડાયેલા અનુભવો જણાવશે. પુસ્તકમાં સોનિયાએ ઇટાલીમાં વિતાવેલા બાળપણથી લઈને કેમ્બ્રિજમાં રાજીવ ગાંધી સાથે મુલાકાત સુધીનો ઉલ્લેખ કર્યો છે. તેમાં નેહરુ-ગાંધી પરિવારમાં લગ્ન અને પરિવારમાં થયેલી હત્યાઓ પછી બદલાયેલા જીવન વિશે લખ્યું છે. સોનિયાએ કહ્યું કે તેમના પરિવાર વિશે ઘણું લખવામાં આવ્યું છે, પરંતુ તેમના ઇરાદાઓ, કામ અને માનવીય પાસાઓને તે રીતે સમજવામાં આવ્યા નથી. ઘણી રીતે આ પુસ્તક તેમની માનવતાને સમર્પિત છે.તેમના મતે, આ પુસ્તક તેમના જીવનની સાથે સાથે ભારતમાં લગભગ છ દાયકા દરમિયાન થયેલા સામાજિક અને રાજકીય પરિવર્તોને જોવાનો એક અલગ દ્રષ્ટિકોણ પણ આપે છે.જ્યારે મેં રાજકારણથી થોડું અંતર રાખીને પાછળ ફરીને મારા જીવનને જોયું, ત્યારે મને મારી કહાનીમાં પ્રેમ અને વફાદારીનો એક દોરો સ્પષ્ટ દેખાયો.

આ દોરો ઇટાલીના એક નાના શહેરમાં વિતાવેલા સાધારણ બાળપણથી શરૂ થઈને ભારતમાં રાજીવ ગાંધીની પત્ની અને ઇન્દિરા ગાંધીની પુત્રવધૂ તરીકે વિતાવેલા જીવન સુધી જાય છે. ડૉ. મનમોહન સિંહના મીડિયા એવાઇઝર રહેલા સંજય બારૂએ 'ધ એક્સિડેન્ટલ પ્રાઇમ મિનિસ્ટર' નામનું પુસ્તક લખ્યું હતું, બાદમાં તેના પર ફિલ્મ પણ બની હતી. તેમાં સોનિયા ગાંધીના વડાપ્રધાન બનવાથી પાછળ હટવા અને ડૉ. મનમોહન સિંહના વડાપ્રધાન બન્યા પછીનો ઘટનાક્રમ જણાવવામાં આવ્યો છે.