આ કાર્યવાહી પાછળ તાજેતરમાં બનેલી હત્યાની કોશિશની ઘટના જવાબદાર છે. ગત 30 માર્ચના રોજ પડવલા ગામના દીપેનભાઈ માકડીયા પર આરોપી અલીમામદ અને તેના સાગરીતોએ પૂર્વ આયોજિત કાવતરાના ભાગરૂપે 'થાર' ગાડી વડે ટક્કર મારી હુમલો કર્યો હતો. આ કેસની તપાસ દરમિયાન રાજકોટ રેન્જ IG અને જિલ્લા પોલીસ વડાએ આરોપીના ગુનાહિત ઈતિહાસ અને ગેરકાયદે મિલકતોની તપાસ કરવા આદેશ આપ્યા હતા, જેમાં આ ગેરકાયદે બંગલાનો ખુલાસો થયો હતો.

સ્થાનિક પંચાયત અને તલાટી દ્વારા અગાઉ નોટિસની બજવણી કરવામાં આવી હોવા છતાં આરોપીએ દબાણ દૂર કર્યું નહોતું. પરિણામે, તાલુકા વિકાસ અધિકારી ઉપલેટા અને મામલતદારની ટીમે આજે પોલીસના ચુસ્ત બંદોબસ્ત સાથે સ્થળ પર પહોંચીને આલીશાન મકાનને તોડી પાડવાની કામગીરી શરૂ કરી હતી. આ હાઈ-પ્રોફાઈલ ડિમોલેશન જોવા માટે મોટી સંખ્યામાં લોકો એકઠા થયા હતા અને તંત્રની આ કડક નીતિની ચર્ચા આખા જિલ્લામાં પ્રસરી છે.

પોલીસ તપાસ મુજબ, અલીમામદ શેઠા વિરુદ્ધ હત્યાની કોશિશ, મારામારી અને આર્મ્સ એક્ટ સહિત કુલ 13 ગંભીર ગુનાઓ નોંધાયેલા છે. દીપેનભાઈ પર થયેલા હુમલાના કેસમાં અત્યાર સુધીમાં નોમાન શેઠા સહિત પાંચ શખ્સો અને એક સગીરની ધરપકડ કરવામાં આવી છે. જોકે, મુખ્ય આરોપી અલીમામદ હજુ પણ પોલીસની પકડથી દૂર છે.

હાલમાં ભાયાવદર પોલીસ અને ASP સિમરન ભારદ્રાજની ટીમ દ્વારા ફરાર આરોપીને ઝડપી પાડવા માટે વિવિધ દિશાઓમાં ચક્રો ગતિમાન કરવામાં આવ્યા છે. ગેરકાયદે મિલકત પર બુલડોઝર ફેરવવાની આ કાર્યવાહીએ જિલ્લાના ગુનેગારોમાં ફફડાટ મચાવી દીધો છે અને કાયદાનું શાસન સ્થાપવા તરફનું આ એક મજબૂત ડગલું માનવામાં આવી રહ્યું છે.