સુરત જેવી હાલતનો ખતરો: શહેરના 87 રસ્તા જળબંબાકાર થવાની આશંકા

ઈમરજન્સી નંબર જાહેર : માત્ર 8 થી 10 ઈંચ વરસાદમાં રાજકોટના તમામ અંડરબ્રિજમાં પાણી ભરાશે

સિટી ન્યૂઝ@રાજકોટ

સુરતમાં તાજેતરમાં પડેલા ભારે વરસાદ બાદ સર્જાયેલી જળબંબાકાર સ્થિતિ વચ્ચે રાજકોટ માટે પણ ચેતવણીરૂપ સ્થિતિ સામે આવી છે. રાજકોટ મહાનગરપાલિકાએ શહેરના એવા ૮૭ માર્ગોની યાદી જાહેર કરી છે જ્યાં દર વર્ષે વરસાદી પાણી ભરાય છે. જો શહેરમાં એકસાથે ૫ ઈંચ અથવા તેનાથી વધુ વરસાદ પડશે તો અનેક મુખ્ય માર્ગો પાણીમાં ગરકાવ થવાની અને ૮ થી ૧૦ ઈંચ વરસાદમાં શહેરના તમામ અંડરબ્રિજ પાણીથી ભરાઈ જવાની શક્યતા વ્યક્ત કરવામાં આવી છે.

દર વર્ષે પ્રિ-મોન્સૂન કામગીરીના દાવા છતાં ભારે વરસાદ દરમિયાન શહેરના અનેક વિસ્તારોમાં પાણી ભરાવાની સમસ્યા યથાવત રહે છે. ૧૫૦ ફૂટ રિંગ રોડ, કાલાવડ રોડ, ગોંડલ રોડ, મવડી સર્કલ, રેલનગર અંડરબ્રિજ, પોપટપરા નાળા સહિતના વિસ્તારોમાં વાહનવ્યવહાર પ્રભાવિત થવાની શક્યતા રહે છે. પાણી ભરાવાને કારણે વાહનો બંધ પડી જવા, ટ્રાફિક જામ અને અકસ્માતોના બનાવો પણ વધે છે.

મનપાના જણાવ્યા મુજબ સંવેદનશીલ વિસ્તારોમાં ભારે વરસાદની સ્થિતિ સર્જાય તો હેવી પંપિંગ મશીનરી અને ઈમરજન્સી ટીમો દ્વારા તાત્કાલિક પાણીનો નિકાલ કરવામાં આવશે. શહેરના ત્રણેય ઝોનમાં ખાસ મોનિટરિંગની વ્યવસ્થા કરવામાં આવી છે. નાગરિકોની સુવિધા માટે મહાનગરપાલિકાએ ૨૪ કલાક કાર્યરત કંટ્રોલ રૂમના ઈમરજન્સી સંપર્ક નંબર પણ જાહેર કર્યા છે. પાણી ભરાવું, વૃક્ષ ધરાશાયી થવું અથવા અન્ય વરસાદી આપત્તિ અંગે ફરિયાદ માટે ટોલ ફ્રી નંબર ૧૫૫૩૦૪, તેમજ ૦૨૮૧-૨૨૨૮૭૪૧ અને ૦૨૮૧-૨૨૨૫૭૦૭ પર સંપર્ક કરી શકાય છે.

ભારે વરસાદ દરમિયાન શહેરના મુખ્ય માર્ગો અને અંડરબ્રિજમાં સ્થિતિ કેવી રહે છે અને તંત્રની તૈયારીઓ કેટલી અસરકારક સાબિત થાય છે તેના પર હવે સૌની નજર છે.

ભારે વરસાદમાં આ રસ્તા પાણી-પાણી થવાની શક્યતા