સિટી ન્યુઝ @ એકતાનગર (કેવડિયા) 

આજે 22 સપ્ટેમ્બરે સાંજે ચાર વાગ્યાથી ગુજરાતના એકતાનગર (કેવડિયા)માં 72મો નેશનલ ફિલ્મ એવોર્ડ યોજાવા જઈ રહ્યો છે. વર્ષ 1954થી શરૂ થયેલા નેશનલ ફિલ્મ એવોર્ડના 72 વર્ષના ઇતિહાસમાં પ્રથમ વખત દિલ્હી બહાર આ સમારોહ યોજાઈ રહ્યો છે અને તેની યજમાની ગુજરાત કરી રહ્યું છે. આ ઐતિહાસિક અવસરમાં હાજરી આપવા માટે રાષ્ટ્રપતિ દ્રૌપદી મુર્મૂ વડોદરા થઈને કેવડિયા પહોંચ્યા છે, જ્યાં બોલિવૂડ અને સાઉથ ફિલ્મ ઇન્ડસ્ટ્રીના દિગ્ગજ કલાકારોનો જમાવડો થયો છે.

આ સમારોહમાં ફિલ્મ 'આર્ટિકલ 370'ને સર્વશ્રેષ્ઠ ફીચર ફિલ્મ, ફિલ્મ 'શ્રીકાંત'ને સર્વશ્રેષ્ઠ હિન્દી ફિલ્મ અને યામી ગૌતમને લીડિંગ રોલમાં બેસ્ટ એક્ટ્રેસનો એવોર્ડ અપાશે. જ્યારે, 'ભ્રમયુગમ' માટે મમૂટી અને 'ચંદુ ચેમ્પિયન' માટે કાર્તિક આર્યનને લીડિંગ રોલમાં બેસ્ટ એક્ટરનો એવોર્ડ મળશે. આ ઉપરાંત, ગુજરાતી ફિલ્મ 'મારણ'ને બેસ્ટ ગુજરાતી ફિલ્મનો એવોર્ડ એનાયત કરવામાં આવશે, જેણે રાજ્ય અને ગુજરાતી સિનેમાનું ગૌરવ વધાર્યું છે.

સ્ટેચ્યુ ઓફ યુનિટીની નજીક મહેમાનો માટે ખાસ એસી જર્મન ડોમ બનાવવામાં આવ્યો છે, જેમાં 1000 લોકો બેસી શકે તેવી વ્યવસ્થા કરાઈ છે. સાંજે 4 થી 5:15 વાગ્યા દરમિયાન રાષ્ટ્રપતિ દ્રૌપદી મુર્મુ, કેન્દ્રીય મંત્રીઓ અને મુખ્યમંત્રી ભૂપેન્દ્ર પટેલની ઉપસ્થિતિમાં દીપ પ્રાગટ્ય અને રાષ્ટ્રગાન સાથે મુખ્ય સમારોહની શરૂઆત થશે, ત્યારબાદ વિવિધ શ્રેણીઓમાં એવોર્ડ એનાયત કરવામાં આવશે.

એવોર્ડ વિતરણ બાદ સાંજે 6:30 વાગ્યા પછી મહેમાનો માટે નર્મદા નદી કાંઠે વિશેષ સાંસ્કૃતિક કાર્યક્રમનું આયોજન કરવામાં આવ્યું છે. આ ઉપરાંત સ્ટેચ્યુ ઓફ યુનિટી ખાતે ખાસ થીમ આધારિત લેઝર તેમજ લાઇટ એન્ડ સાઉન્ડ શોનું પણ ભવ્ય આયોજન કરાયું છે, જે આ સમગ્ર ઉત્સવમાં વિશેષ આકર્ષણ જમાવશે.

ગુજરાતી સિનેમા માટે ગર્વની વાત કરીએ તો, યશ સોની અને દીક્ષા જોશી અભિનિત તથા અભિષેક જૈનના ડિરેક્શનમાં બનેલી ફિલ્મ 'મારણ' સમાજમાં મહિલાઓની શોષણની સ્થિતિ પર પ્રકાશ પાડે છે. આ ફિલ્મે અગાઉ 15મા શિકાગો સાઉથ એશિયન ફિલ્મ ફેસ્ટિવલ (CSAFF)માં બેસ્ટ ફીચર ફિલ્મ (જ્યુરી)નો એવોર્ડ પણ જીત્યો છે.

ગુજરાતમાં સિનેમા જગતનો મહાકુંભ

ગુજરાતના એકતાનગરમાં યોજાઈ રહેલો આ 72મો નેશનલ ફિલ્મ એવોર્ડ સમારોહ દેશભરની કલા અને સંસ્કૃતિને એક મંચ પર લાવ્યો છે, જે ભારતીય સિનેમાના ઇતિહાસમાં એક સીમાચિહ્નરૂપ બની રહેશે.