• કેન્દ્રીય રાજ્યમંત્રી એલ. મુરુગને પદ પરથી રાજીનામું આપ્યું.

• રાજ્યસભાની સદસ્યતા છોડી તમિલનાડુમાં પક્ષ મજબૂત કરશે.

• વિધાનસભા ચૂંટણીમાં થલાપતિ વિજયના ઉમેદવાર સામે હાર્યા હતા

સિટી ન્યુઝ @ નવી દિલ્હી

કેન્દ્રીય માહિતી અને પ્રસારણ તેમજ સંસદીય બાબતોના રાજ્યમંત્રી એલ. મુરુગને પોતાના પદ પરથી અચાનક રાજીનામું આપી દીધું છે. વડાપ્રધાન નરેન્દ્ર મોદીને લખેલા પાંચ પાનાના પત્રમાં તેમણે મંત્રીપદની સાથે-સાથે પોતાની રાજ્યસભાની સદસ્યતા પણ છોડવાની જાહેરાત કરી છે, જેથી તેઓ તમિલનાડુમાં ભાજપને વધુ મજબૂત કરવા માટે પૂરતો સમય ફાળવી શકે.

મુરુગને પત્રમાં ઉલ્લેખ કર્યો છે કે વડાપ્રધાનના નેતૃત્વ હેઠળ દેશ અને તમિલનાડુની સેવા કરવી તેમના જીવનનું સૌથી મોટું સન્માન રહ્યું છે. ગરીબ પરિવારમાંથી આવતા અને દૈનિક મજૂર માતા-પિતાનું સંતાન હોવા છતાં, તેમણે રાષ્ટ્ર પ્રથમ, પક્ષ બીજા અને પોતે સૌથી અંતેના મૂળ મંત્ર સાથે ૩૦ વર્ષ સુધી ભાજપ અને એબીવીપીમાં નિષ્ઠાપૂર્વક સેવા આપી છે.

ઉલ્લેખનીય છે કે, આ વર્ષે ૪ મેના રોજ જાહેર થયેલા તમિલનાડુ વિધાનસભા ચૂંટણીના પરિણામોમાં એલ. મુરુગન અવિનાશી (SC) બેઠક પરથી ચૂંટણી લડ્યા હતા, જ્યાં તેઓ મુખ્યમંત્રી વિજયની પાર્ટી (ટીવીકે)ના ઉમેદવાર કમાલી એસ. સામે ૧૫,૩૭૩ મતોથી હારીને બીજા ક્રમે રહ્યા હતા. ચૂંટણીમાં પરાજય બાદ તેમનું આ પગલું રાજકીય વર્તુળોમાં ભારે ચર્ચાનો વિષય બન્યું છે.

મુરુગન જ્યારે પ્રથમવાર મંત્રી બન્યા હતા, ત્યારે તેમના માતા-પિતા નમક્કલ જિલ્લાના કુનૂર ગામમાં દૈનિક મજૂરી કામ કરતા હતા. પુત્ર મંત્રી બન્યા બાદ પણ તેમના જીવનશૈલીમાં કોઈ ફેરફાર આવ્યો નહોતો અને તેઓ સામાન્ય નાગરિકોની જેમ જ પોતાની દિનચર્યા વિતાવતા હતા. તેમના માતા વરુદમ્મલે ગર્વ સાથે જણાવ્યું હતું કે પુત્રએ આ મુકામ પોતાની મહેનતથી મેળવ્યો છે.

તમિલનાડુના મૂળ નિવાસી એવા એલ. મુરુગન મધ્યપ્રદેશમાંથી રાજ્યસભાના સાંસદ હતા અને તેમનો કાર્યકાળ એપ્રિલ ૨૦૩૦ સુધીનો હતો, પરંતુ તેમણે અચાનક પદ અને સદસ્યતા બંને છોડીને સંગઠનાત્મક કાર્ય માટે મેદાનમાં ઉતરવાનો નિર્ણય કર્યો છે.