• જંતર-મંતર પર વિરોધ પ્રદર્શન કરનાર નેતાઓની ધરપકડ.

• કોકરોચ જનતા પાર્ટીના બે નેતાઓ પાંચ દિવસીય કસ્ટડીમાં.

• મુખ્ય ચૂંટણી કમિશનરના રાજીનામાની માંગ સાથે કર્યો વિરોધ.

સિટી ન્યુઝ @ નવી દિલ્હી

દિલ્હીના જંતર-મંતર પર ગેરકાયદેસર રીતે પ્રવેશ કરીને મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ સાથે વિરોધ પ્રદર્શન કરવાના મામલે કોકરોચ જનતા પાર્ટી (CJP) સામે દિલ્હી પોલીસે કડક કાર્યવાહી હાથ ધરી છે. પોલીસે CJP ના પ્રમુખ નેતાઓ સૌરવ દાસ, આશુતોષ રાંકા અને અજિંક્યા શિંદેની ધરપકડ કરી લીધી હતી.

પોલીસ કસ્ટડી બાદ SEM કોર્ટે સૌરવ દાસ અને આશુતોષ રાંકાને ૫ દિવસની ન્યાયિક કસ્ટડીમાં મોકલી દીધા છે. આ નેતાઓ પોલીસની કડક સુરક્ષા અને ભારે બેરિકેડિંગને તોડીને જંતર-મંતર પહોંચ્યા હતા, જેના કારણે પોલીસે પીસ બોન્ડની શરતોના ભંગ સહિતના ગુના હેઠળ FIR નોંધી છે. CJP ની લીગલ હેડ રત્ના સિંહના જણાવ્યા અનુસાર અટકાયત કરાયેલા નેતાઓને મંદિર માર્ગ પોલીસ સ્ટેશન ખાતે મેજિસ્ટ્રેટ સમક્ષ રજૂ કરવામાં આવ્યા હતા.

કોંગ્રેસ નેતા રાહુલ ગાંધીએ CJP નેતાઓની ધરપકડ અને ૫ દિવસની કસ્ટડી સામે સવાલો ઉઠાવતા નિવેદન આપ્યું હતું કે જંતર-મંતર પર જઈને તિરંગો લહેરાવવો એ કોઈ ગુનો નથી. આ વિરોધ પ્રદર્શન એવા સમયે થયું છે જ્યારે દિલ્હી પોલીસ કમિશનર અનુરાગ કુમારે ૧૧ ઑક્ટોબરે સ્થાયી આદેશ જારી કરીને રામલીલા મેદાન, બુરાડી મેદાન અને સીબીડી મેદાનને જ ધરણા-પ્રદર્શન માટેના નવા સ્થળો તરીકે સૂચિબદ્ધ કર્યા છે અને જંતર-મંતરને આ યાદીમાંથી હટાવી દીધું છે.

CJP ના સભ્યોનું દાવો છે કે તેઓ ૧૨ ઑક્ટોબરે શાંતિપૂર્ણ પ્રદર્શન માટે સંસદ માર્ગ પોલીસ સ્ટેશન પહોંચ્યા હતા. હાલમાં દ્વારકા જિલ્લાના જાફરપુર કલાં પોલીસ સ્ટેશન વિસ્તારમાં સંગઠનના કાર્યકર્તાઓ મોટી સંખ્યામાં એકઠા થઈ જતા આસપાસના વિસ્તારમાં સુરક્ષા વ્યવસ્થા સઘન બનાવી દેવામાં આવી છે અને સમગ્ર મામલે કાનૂની કાર્યવાહી ચાલી રહી છે.

 જંતર-મંતર વિવાદ અને CJP નેતાઓની ધરપકડ