• શનાળા રોડ પર મોડી રાત્રે મારામારીની ઘટના બની.

• સામસામી ફરિયાદોના આધારે સાત લોકો સામે ગુનો નોંધાયો.

• પાઇપ અને છરીના હુમલામાં યુવકોને ગંભીર ઈજાઓ થઈ.

સિટી ન્યુઝ @ મોરબી

મોરબીના શનાળા રોડ પર આવેલા હાઉસિંગ બોર્ડ પાસે ૧૩ ઑક્ટોબરની મોડી રાત્રે શાળાના જૂના ઝઘડાની અદાવતમાં બે જૂથો વચ્ચે ઉગ્ર મારામારીની ઘટના બની છે. આ મામલે બંને પક્ષો દ્વારા સામસામી ફરિયાદો નોંધાવવામાં આવી છે, જેના આધારે પોલીસે કુલ ૭ લોકો સામે ગુનો દાખલ કરીને આગળની કાનૂની તપાસ શરૂ કરી દીધી છે.

પ્રથમ પક્ષ તરફથી ૧૭ વર્ષિય અલ્પેશભાઈ પરમારે ફરિયાદ નોંધાવી છે કે તેમના નાના ભાઈ ચંદ્રકાંતને સ્કૂલમાં પ્રિયાન જોગડ હેરાન કરતો હતો અને માર મારતો હતો. ઘટનાની રાત્રે પ્રિયાન જોગડ, મીત, પાર્થરાજસિંહ ઝાલા અને ઉર્વરાજસિંહ ઝાલાએ હુમલો કર્યો હતો, જેમાં પાર્થરાજસિંહે લોખંડના પાઇપથી અલ્પેશભાઈના માથામાં ઘા મારતા તેમને ગંભીર ઈજાઓ થઈ હતી અને ત્રણ ટાંકા આવ્યા હતા.

બીજી બાજુથી ૨૬ વર્ષિય ઉર્વરાજસિંહ ઝાલાએ સામી ફરિયાદ નોંધાવી છે કે તેમના ભાણેજ પાર્થરાજસિંહ ગોહિલે ફોન કરીને મારામારીની જાણ કરતા તેઓ ઘટનાસ્થળે પહોંચ્યા હતા. ત્યાં ચંદ્રકાંત તેમના સગા સંબંધીઓને મારપીટ કરી રહ્યો હતો. આ ઝઘડો છોડાવવા જતાં અલ્પેશભાઈ અને પરસોતમભાઈ સાથે બોલાચાલી થઈ હતી, જેમાં પરસોતમભાઈએ છરીથી ઉર્વરાજસિંહને અને અલ્પેશભાઈએ ક્રિષ્નરાજસિંહને ઈજા પહોંચાડી હોવાનો આક્ષેપ કરાયો છે.