સિટી ન્યુઝ @ પુણે : મહારાષ્ટ્રના પુણે જિલ્લાના માવલ તાલુકામાં પિકનિક મનાવવા ગયેલા મિત્રોની ખુશી ક્ષણભરમાં માતમમાં ફેરવાઈ ગઈ હતી. નવલખ ઉમ્બ્રે ગામ પાસે આવેલા જાદવવાડી ડેમ પર શુક્રવારે બપોરે આશરે 3:00 વાગ્યે સેલ્ફી લેતી વખતે ત્રણ યુવાનોના ઊંડા પાણીમાં ડૂબી જવાથી કરુણ મોત નીપજ્યા છે. આ ઘટનાને પગલે મૃતક યુવાનોના પરિવારજનોમાં ભારે આક્રંદ છવાયો છે.

મળતી વિગત મુજબ, પુણેના ભોસારી વિસ્તારમાંથી છ મિત્રોનું એક જૂથ પિકનિક મનાવવા માટે જાદવવાડી ડેમ પર આવ્યું હતું. પોલીસના જણાવ્યા અનુસાર, આ જૂથના ચાર સભ્યો ડેમમાં ઘૂંટણ સુધીના પાણીમાં ઊભા રહીને એકબીજાના ગળે હાથ નાખીને સેલ્ફી લઈ રહ્યા હતા. આ દરમિયાન કિનારે ઉભેલા એક મિત્રનો પગ અચાનક લપસ્યો હતો. ચારેય મિત્રોએ એકબીજાના ગળે હાથ નાખ્યા હોવાથી તેઓ સાંકળની જેમ એક પછી એક ઊંડા પાણીમાં ખેંચાઈ ગયા હતા.

આ અકસ્માત સમયે થોડે દૂર ઉભેલો જૂથનો અન્ય એક મિત્ર બચાવવા માટે તુરંત દોડી આવ્યો હતો. તેણે હિંમત બતાવી પાણીમાં ડૂબી રહેલા ચાર મિત્રો પૈકી એકને સુરક્ષિત રીતે બહાર કાઢવામાં સફળતા મેળવી હતી. જોકે, કમનસીબે બાકીના ત્રણ મિત્રો પળવારમાં જ ઊંડા પાણીમાં ગરકાવ થઈ ગયા હતા અને લાપતા બન્યા હતા.

દુર્ઘટનાની જાણ થતા જ સ્થાનિક પોલીસ સહિત વન્યજીવ રક્ષક માવલ સંસ્થા, શિવદુર્ગ બચાવ દળ અને નેશનલ ડિઝાસ્ટર રિસ્પોન્સ ફોર્સ (NDRF) ની ટીમો તાત્કાલિક ઘટનાસ્થળે પહોંચી હતી. બચાવ ટુકડીઓ દ્વારા હાથ ધરવામાં આવેલા સઘન સર્ચ ઓપરેશન બાદ ત્રણેય યુવાનોના મૃતદેહ બહાર કાઢવામાં આવ્યા હતા. આ દુર્ઘટનામાં જીવ ગુમાવનાર યુવાનોની ઓળખ અજય ગરુડે, સંતોષ એડકે અને અનિકેત પવાર તરીકે થઈ છે.

હાલમાં પોલીસે આ મામલે અકસ્માતે મોતનો ગુનો નોંધી વધુ તપાસ હાથ ધરી છે. ઉનાળાની સીઝનમાં જળાશયો પર પિકનિક માટે જતા સહેલાણીઓ માટે આ ઘટના એક લાલબત્તી સમાન છે. સેલ્ફી લેવાના મોહમાં જાગૃતિના અભાવે આશાસ્પદ યુવાનોએ પોતાનો જીવ ગુમાવ્યો હોવાથી સમગ્ર પંથકમાં અરેરાટી વ્યાપી ગઈ છે.